3724/2022-2023

Aizawl, the 1st March, 2023: Vawiin khan School Education Minister Pu Lalchhandama Ralte hovin Zoram Kohhran Hmeichhe Inkhawmpui Lian Darlawna neih tur inbuatsaihna Darlawn Presbyterian Kohhran Hall-ah thlirho a ni a, Minister ho hian inkhawmpuina tur Pandal leh a chheh vel thlirho a ni bawk.

Minister chuan he hunah hian thusawiin inkhawmpui hlawhtling tak neih a nih theih nan leh chhungkaw tin ten tha taka mikhual an lo dawnsawn theih nan veng chhung mipuite inhlawhna tur veng tinah cheng nuai hnih theuh ruahman a nih thu a sawi a, Organising Committee-ten lawmawm an ti hle.

Pu Lalchhandama Ralte chuan Darlawn veng chhung tihfai nan leh chei nan VC tin hnenah Rs. 70,000/- theuh pek an nih thu a sawi bawk a, Chhungkaw tin te chu tha taka mikhual thleng thei tura inbuatsaih sauh sauh turin a sawm a, mikhualte hahdam leh nuam taka an thlen theih nan sorkarin a theih ang angin hma a la tih a sawi bawk.

Rev B.Darnghakliana Bialtu Pastor leh Chairman Organising Committee-in inkhawmpui inbuatsaih dan thlirhona hi a kaihruai a. Sorkar hmalaknaa Department hrang hrangten inkhawmpui neihna tura Darlawn khaw chhunga hna an thawh dan an report a. PWD ten veng chhung kawng black topping an zawh hman tur thu an report a, PHE ten inkhawmpui chhunga tui hnianghnar taka pek theih an tum thu te, Power & Electricity ten tha taka eng pek theih tura an ruahman dan te, Supply & Consumer Affairs Dept ten inkhawmpui hmaa buhfai quota sem an tum thu te leh buhfai chhekkhawl sa an ngah thu te an report a, Police lamin lirthei tlan dan tur te, buaina siam an awm loh nana an hmalakna te an report a. School Education lamin School building hrang hrangte chu mikhualte riah nan hman theih a nih thu an sawi bawk.

Zoram Hmeichhe Inkhawmpui Lian inbuatsaih dan thlirhonaah hian Minister Pu Lalchhandama Ralte bakah Organising Committee te, Darlawn BDO leh khaw chhunga Department hrang hrang officer te an tel hlawm a ni.