Health & Family Welfare leh Trade & Commerce Minister Pu Lalrinliana Sailo chuan vawiin khan a department enkawl hnuaia hmun pawimawh pahnih, New Market building thar leh Aizawl Civil Hosital te tlawhin an dinhmun a en.
New Market building thar hi nikum lama zawh fel tawh ni mah se, Mizoram chhunga sangha thar zuartute tih loh chu tun thlengin luahtu an la awm lova. Hetih lai hian New market building thenkhat erawh chu a rawih tawhin luahtu an thahnem avangin a chep hle thung a. New Market hmunhma felfai leh thawveng zawka siam turin building thar hi a luah man te bithliah fel a, thil zuartute pawh an insuan luh thuai na tur chungchang te Minister leh amah tawiawmtu department hotute chuan an sawi ho a ni.

New Market a tlawh hnuin Minister chuan Aizawl Civil Hospital tlawhin Hospital chhunga damlo nawr kualna tura ramp siam tur leh building sak thar tura ruahmanna te a thlirpui a. Cardiology department, ICU, Neo-natal ICU, Cabin leh Ward dangte a fan kual hnuin Medical Superintendent office-ah Civil Hospital thuneitute leh doctor rualte  a kawm a. Tun sorkar hnuaiah hian mipui hriselna lam chu uar a ni dawn tih sawiin tan lakna tura a ngaih pawimawh deuh deuh te a tarlang a.Thingtlang lama mitthi ruang phurhna turin morgue van 2 tun hnaiah lei a ni dawn tih sawiin thawktu leh hmanraw chungchangah pawh tun aia changtlung zawka Aizawl Civil Hospital chu thuam chho zel turin theihtawpa tan lak a tum tih a sawi a ni.

New Market leh Aizawl Civil Hospital a tlawhna ah te hian Minister hi Parliamentary Secretary Pu S.Laldingliana’n a tawiawm a ni.