Health and Family Welfare Minister Pu Lalrinliana Sailo chuan vawiin khan I&PR Conference Hall-ah Mizoram State Tobacco Control Society (MSTCS) buatsaih Smoke Free Mizoram website "www.smokefreemizoram.nic.in" a hawng.

Hawnna inkhawmah Health Minister hian thu sawiin Mizote nunphunga tel thil pakhat vaihlo hian rah tha lo a ngah a, cancer leh natna hrang hrang a thlen nasa a ti a. Vaihlo leh vaihlo atanga siam thil te hi khawvelin a do a, India ramin a do a, Mizoram pawhin kan do a ni tih sawiin Mizoram chu meizuk lohna state ah siam tum a ni a ti a; Kohhran te, tlawmngai pawl hrang hrangte thawhpui atan a sawm nghal bawk. Minister hian tangkai taka hman a nih theihna tura duhsakna hlanin website thar hi a hawng a ni.

Hawnna inkhawmah hian Dr. D. Baruah, Director, Hospital & Medical Education chuan Welcome Speech a sawi a. Dr. Jane R. Ralte, State Nodal Officer cum Project Officer, Smoke Free Mizoram hnen atangin website chungchang ngaihthlak a nih bakah Pi Lalhmachhuani, Web Coordinator, NIC chuan Technical Report a pe a, Pu Thanseia, Secretary, Indian Society of Tobacco and Health (Mizoram Chapter) chuan Concluding Speech a sawi bawk.

Smoke Free Mizoram website hi Mizo thalaite zinga vaihlo lo hluar chho zel dona tur te, vaihlo leh a kaihhnawih chungchanga hriatduh leh harsatna nei ten an lo en atan leh MSTCS hmalakna leh he society chungchanga sawi duh neiten an sawina atan te buatsaih a ni. He website hi National Informatics Center (NIC) in an siamsak leh an host a ni.