Thangkura Drama & Film Industrial Co-Operative Society Ltd. Mizoram te buatsaih Mizo film thar  Chhinlung Chhuak “ Unauza Kan Ni” tih chu vawiin khan  Pu Lalrinmawia Ralte, Environment & Forest Minister  chuan  I & PR  Auditorium ah a tlangzarh.

Thu leh Hla, Rimawi, film  leh a dangte hi  Fine Arts vek a niin  hetiang lama  tangkai taka sulsutu  te nen vawiina hun an hmang ho thei chu  lawmawm a tih thu sawiin  Khuallian Pu Lalrinmawia chuan thil reng reng hi a bul tantu tan chuan  a tirah a beidawnthlak viau mai thei, mahse  rualawhna te avangin  tihtak zeta bul tantu an awm loh chuan hmasawnna a awm thei lo a. Film lamah pawh tuna kan thlen chinah  kan zahpuiawm lova, tha lo leh fel lo lai ah chuan  thataka inhrilh zel in hmasawn zel kan tum tur  a ni  a, mi thiltih sawisel ringawt lovin, kan kovah  nghahchhin  phawt  zel tha  a tih thu a sawi.

Hollywood chu sawi loh, Bollywood  te chu film  an siam hmasak ber atangin tunah kum 117na ah  an awm mek  a, keini tan chuan tluk rual an ni lo, keini Mizo te chuan film pakhatah  Cheng Vaibelchhe  chuang man ang chi  kan la siam ve lo, tuna kan  sum neih leh  kan Camera te mil tawk anga kan siam hi a hlu hle  a ni  tiin khuallian chuan  Mizo Film  hi chu a tak a, a hmuhnawm a, lemchang thiam  tur chuan  lemchang lo anga lan tur a ni a ti a. Insual ah pawh an  insual tak tak a, an tap leh an nui pawh a tak bik tiin  “Unauza Kan Ni” tih film chu  a entu apiang in thinlung taka harh chhuahna an neih nan a  tlangzarh a ni.

Thangkura Drama Society Chairman Pu C. Vanlallawma kaihhruai  vawiina  film tlangzarhna ah hian  Pu Hmingthangvunga,President, Mizoram Film Development Society chuan  he film kalhmang leh thlirlawkna hun  a hmang a. He film hi hnam  inpumkhatna a niin  fiamthu leh  ramthla tam tak  lan tir anih thu a sawi. Pu Lalawmpuia Khiangte, Vice President, MFDS leh Pu B. Lalthlengliana, Secretary, Thangkura Drama Party te pawhin thu an sawi bawk a ni.