Pu Lalrinmawia Ralte, Minister of Labour Employment & Industrial Training chuan vawiin chhun khan Govt. ITI Aizawl Room No 2 ah zirlai chhuak turte hnenah certificate leh hmanrua semna a hmanpui a. Govt. ITI Aizawl website a hawng nghal bawk.

Course hrang hrang a training chhuakte fuihin khuallian Pu Lalrinmawia Ralte chuan he hmun atanga an zir thiamte chu duh tawk mai lovin eizawnna tlaka zir chhunzawm zel tura a duh thu leh vawiin certificate an dawn ah chuan duhtawk mai lovin hnathawh nan leh eizawnna tlinga hmang ngei turin a fuih. An thiamna te chu chhaw tlak ni tur chuan an thawh chhunzawm zel a ngai a, chumi atan chuan an ngaihtuahna te thil dang tul lovah hmang lovin an hmasawnna tur atan zawka rilru sawrbing thiam turin a chah a. An thiamna zirchhuah te chu anmahni tan bakah midangte tana malsawmna ni tura tanpui nana hmang turin a chah bawk a. Training chhuakte hnenah chuan Minister hian certificate hlanin Govt. ITI Aizawl website chu a mamawh ten tangkai taka hman turin a hawng nghal a ni.

Pu K. Valy, Jt. Director, LE & IT kaihhruai vawiin programme ah hian Pu Lalmuanawma, Principal Govt. ITI Aizawl chuan report a pe a, training chhuakte aiawhin thu sawi a ni bawk. Govt. ITI Aizawl hian Mizoram Building and other Construction Welfare Board tanpuina in Construction Sector hnuaiah : Short Course training in heng a hnuaia course hrang hrang : Basic Course of House Wiring; Basic Course of Architectural and civil 2D drafting with AutoCAD; Basic Course of Building Carpenter; Basic Course of Plumber; Basic Course of Mason; Basic Course of Land Surveyor hi an kalpui a. Kumin January atang khan Class kal tanin zirlai 64 an nei a, April thla tir khan exam neiin zirlaite hian hlawhtling takin training an zo a ni.

Minister hi LE&IT Department officer te leh Mizoram Youth Commission a officer thenkhatin an tawiawm a ni.