Vawiin khan Labour, Employment & Industrial Training Department enkawltu Minister Pu Lalrinmawia Ralte chuan ITI Aizawl-a Block I-a Building No. 3 sak thar a hawng a, zirlai thar an lawm luhna programme Fresh Social a hmanpui bawk a ni.
Pu Lalrinmawia chuan sawrkar hnaah luh zelna tur a awm tawh lova, sawrkar chuan thalaite hmakhaw ngaiin company hrang hrangah an luhna tur leh chumi atana an inzirna tur a ngaihtuah sak zel a ni, a ti. ITI-a course zir thei hrang hrang hi miin thiam taka a zir phawt chuan eizawnna tling anih thusawiin zirlai te chu taima taka an zir lai ngaihven a, an ngaihtuahna leh an rilru tam zawk an zirna kawnga hmang turin a chah a.
Minister chuan zirlaite chu ruihtheih thil hmanga mahni inti chhe lova, chung lak atanga inthiarfihlim turin a fuih a. Mahni zir bikna kawng theuha thiam tak nih tum a, hman tlak tak, thiam bik nih tum turin zirlaite chu a fuih bawk a ni. Minister chuan ITI Aizawl hi Model ITI a siam tum anih thusawiin hemi atan hian Central Sawrkar atangin sum a rawn kal dawn a ni, a ti. Mizo thalai te chu mahni, chhungkua leh ram tana mi tangkai nih tum a, social media lama inhmang tam lo turin a chah bawk.
He hun hi LE&IT Department Principal Secretary Pu P.C. Lallawmsanga IPS in a hmanpui bawk a, Pu P.C. Lallawmsanga chuan thu sawiin zirlaite leh zirtirtute chu Mizoram hi mahni ta anga tak taka enkawla, hmangaih tur leh hma a sawn theih nana thawk rim turin a chah. Mizoramin hma a sawn tak tak theih nan S. Korea anga hna thawk nasa turin a fuih bawk. ITI zirlaite chu mahnia eizawnna hna thawk tlaka thiam turin a chah a ni.
Vawiina building thar hawn hi kum 2011 atanga sak tan a ni a, ground floor hi World Bank Funded Project pakhat -Vocational Training Improvement Project a sak niin, 1st leh 2nd floor te hi Enhancing Skill Development Infrastructure in North East & Sikkim Scheme hmanga sak a ni. Building thar hi trade 5 in an luah a ni.
ITI Aizawl hi 1964 khan din niin kumin hian zirlai 492 an nei mek a, Engineering Trade 18 leh Non-Engineering Trade 5 Course an kalpui mek a ni.
