Vawiin khan Environment & Forests leh Labour, Employment & Industrial Training Department-te enkawltu Minister Pu Lalrinmawia Ralte leh zanhnih riaka lo zin Republic of Korea (South Korea) Ambassador Pu Joongyu Lee leh amah tawiawmtu Korean company lian hotute chuan Minister hi a Office chamber-ah hmuin inkawmhona hun tha tak an nei.

Pu Lalrinmawia Ralte chuan Mizoram Sawrkar sawmna ngaipawimawha Korean palai leh amah tawiawmtu ten Mizoram an rawn zin chu lawmthu hrilhin Mizoram mamawh leh thil tih sak tura an sawm nilovin Mizoram ataka rawn hmu a, inlaichinna te siam a, nakina zelah Mizoram leh Mizo thalai ten kawng hrang hranga Korea thiamna leh theihna te an chawr tangkai theihna tur atana kawng dap leh sawihona a ni, a ti a. Kumina South Korea a awm tur World Bamboo Congress leh World Bamboo Fair ah te Mizorama mau hman tangkai dan leh sawngbawlna tha zawk kawngah te Mizoram tan zir tur tam tak a awm ngei a rin thu te pawh Minister hian Korea ram palai hi a hrilh a ni.

Ambassador Pu Joongyu Lee chuan Mizorama an zin chhungin an kalna apiangah thinlung takin anmahni lo dawngsawngtu ten an lo lawm chu lawmthu sawiin Korean company lian hotulu ten ama sawmna ngaipawimawhin Mizoramah amah an rawn tawiawm a ni, a ti a. Heng company lian ten tunhnai maiah thil rawn ti thei lo mahse Company lian ten mipui rawngbawlna kawng Corporate Social Responsibility (CSR) kaltanga skill development chungchanga kawng awm theite a dappui tur thu Minister a hrilh a. Nakina amah thlaktu Ambassador thar lo awm tur pawh Mizorama zin tura sawm turin a ngen a. Cultural exchange kaltlanga inlaichinna siamna kawng a dap tur thu a sawi a. Tun tum a vawikhat rawn zinna hian nakin zelah Mizoram leh Korea inkarah thawhhona kawng a hawn thei thu leh hemi chungchanga beiseinna sang tak a neih thu te a sawi bawk a ni.

Republic of Korea(South Korea) palai leh amah tawiawmtu te hi vawiin khan Delhi panin an haw a ni.