Nimin (22.11.2016) khan Pu Lalrinmawia Ralte, MoS LE& IT etc. chuan Mizo thlalaite Zoram pawna cruise line leh hospitality industry hrang hranga hna zawnna kawng dappui chungchangah Goa-a hetiang lam industry mi thenkhat a kawm.

Joncia Marine Services Managing Director, Mr. John Dias leh an CEO, Mr. Praveen M Dias te nen thawhho dan kawng awm theite sawiin, anni hian Mizo thlalaite tana ram chhung leh pawn lama hna zawnsak tura zau taka an inhawn thu leh kawng dappui tura Mizorama anmahni ngei lo kal a, seminar neihpui te pawh an duh thu an sawi a. Minister hian chumi kawnga rawtna leh ruahmanna an neihte sawrkar hriattir tur leh lo bawhzuipui a inhuam thu a hrilh a ni.

Anni bakah hian Kamaxi Overseas Consultants Director, Mr. Parixit Pai Fondekar nen pawh inkawmna hun tha tak an nei a. Anni hi cruise line-a eisiamna lam training petu leh hna zawnsaktu an ni a, India ram chhung leh ram pawna cruise line leh hotel-a hna chi hrang hrang zawnsaktu an ni bawk. Pu Parixit chuan Mizoram sorkarin thlalaite hnathawh tur a dappui dan leh a ngaih pawimawhzia chu chhuanawm a ti hle a. An company kal tlanga Mizo thalaite hna zawnsak leh hna hmu tlaka zirtir an inhuam thu leh Mizoram hmun ngeia training buatsaih dan dap an duh thu te a lo hrilh a ni. Anni pawh hi Minister rawtpui angin ruahmanna mumal tak sorkar-a thlehlut thuai tura beisei an ni.

Minister hian nizan khan Goa Mizo Welfare 'Zo Zan’ a hmanpui nghal a. Hei hi Goa Mizo Welfare-in khawtlang huapa programme an neih vawi khatna a ni a, sports an neih kharna leh kal tharte lawmna hun ni nghalin variety program hlimawm leh hmuhnawm tak an buatsaih a, thlalai talent nei tha tak takin an thiamthil an entir a ni. Intihsiakna chi hrang hrang neiin faifuka inzaisiak leh chheihlam te, Goa Mizo Mister leh Miss thlanna te chuan lawm a hlawh hle.

He hunah hian Minister chuan thu sawiin Mizoram sorkarin Mizo thlalaiten eizawnna an hmuh theihna atana hna zawnsak leh training-na kawnga hma a lak tawh leh a lak mek dan te, tourism industry behchhana eizawnna pawimawh dan leh hemi ina a ken tel theih harsatna leh nun khawih pawi thei laka inven thiam a pawimawh zia te, India ram chhung leh ram pawna thalai hnathawka awmten harsatna an tawh chi hrang hrang te pawh a hriatpui thu leh heng harsatna pumpelh tura mahni theuh kan pawimawhzia te, a theih chin chinah sorkar pawhin a tanpui thin dan te a sawi bawk a ni.

Goa Mizo Welfare-ah hian member 224 an inziak lut tawh a, kal thar la inziak lut lo hi hemi zat aia tam mah an awm nia hriat a ni. Goa-a Mizo awmte hi a tam ber chu thalai, hnathawka awm an ni.

Goa Mizo Welfare chuan Mizoram atanga hnathawka Goa-a kal tur ten inbumma leh harsatna chi hrang hrang pumpelh theih nan, an hnathawhna tur chinchang hre chiang hmasa tur leh, thil hre chiang duh leh harsatna neiten Goa Mizo Welfare hruaitute be rawn hmasa thin turin an ngen a ni.