Pu Lalrinmawia Ralte, Parliamentary Secretary chuan ni 5 thangin a bial chhung khaw hrang hrang, Saikhawthlir, Chuhvel, Zamuang, Rengdil, Kawrthah, Tuidam, Tumpanglui, New Eden, Kawrtethawveng, W. Bunghmun, Serhmun leh Darlak khua te a tlawh a, Saikhawthlir khua a NLUP hnuaia mau chin thlangtu, chhungkaw 10 te hnenah Syntex a sem a ni.

Pu Lalrinmawia Ralte, Parliamentary Secretary, Home chuan a bial chhung khaw hrang hrang a tlawh na-ah a mah lo hmuaktu mipuite hnenah thusawiin chhungkaw tin mahni kutke ngeia eizawng thei a buatsaih hi Sawrkar tum ber a nih thu sawiin chumi atana Sawrkar in NLUP a sem mekah pawh a dawngtute an pawiawh ber a ni a ti a. Sum pawh an dawng kim ngei dawn a ni a ti bawk. Pu Lalrinmawia Ralte, Bialtu MLA chuan khawthlang tlangdung hi ei leh bar tharchhuah theihnana hmun tha ber anih thu tarlangin NLUP pawh a tihlawhtling bertu ni turin mipuite a chah a. Teirei lui dungah Darlak leh Luimawi inkarah PMGSY hmangin kawngpui sial tura hmalak a nih tur thu a sawi bawk a ni.

Parliamentary Secretary, Home chuan Mizoram khua leh tui dik takte hruaikir Central leh Mizoram Sawrkarin a duh laiin Mizote leh Bru te inrem taka kan awm duh lo tute an awm a, chung mite chu huaisen taka kan do a tul a ni a ti bawk.

Pu Lalrinmawia Ralte, chuan Special Development Scheme for Western Belt of Mizoram hnuaiah cheng vaibelchhe 33 senna tur Scheme paihfel a ni tawh thu a sawi bawk a ni.

Pu Lalrinmawia, Ralte Bialtu MLA, chuan Darlak khuaa Community Hall sak zawh nan Rs 150000/- a pe a ni.

Pu Lalrinmawia Ralte, Parliamentary Secretary, Home etc chuan a bial khaw hrang hrang a tlawhna-ah hian khawtlangin an lo lawm hle a, khawtlang mamawh a hnena an lo thlente pawh a theih ang anga hmalak pui a tum thu a sawi a ni.

Parliamentary Secretary, Home hi a thiannu Pi Lalthanzami, Pu David H. Lalthangliana OSD. Home leh Mamit-a Department hrang hrang hotuten an tawiawm a ni.