No.74/2019-2020

Pu Lalrinsanga Ralte, Vice Chairman, Rubber & Allied Crops Development Board, Serlui A/C bialtu MLA ni bawk chuan a bial chhung khaw hrang hranga Covid-19 avanga inkharkhipna kalpui a nih avangin mi harsa leh rethei zawk te tan Alu Bag 44, Dal Bag 44, Purunsen Bag 22, Tel Case 44 chu a bial chhung khaw hrang hrang te tan a sem chhuak a. Serlui Bial khua 22 a Village Level Task Force tin te hnenah an duty na a an thingpui lum nan Rs 5000/-(Sangnga) theuh a pe bawk.

Mizoram hmun hrang hrang atanga ruihlo ti thin te thenawm state Assam lamah ruihhlo zawnga kal an tam hle thin a. Ruihhlo zawnga kal an man te hi Vairengtea Golgotha Camping Centre leh Block MHIP enkawl Hope Center ah te dah thin an nih a vangin Serlui bialtu MLA Pu Lalrinsanga Ralte chuan Golgotha Camping Centre hnenah Buhfai Bag 6, Alu Bag 2, Dal Bag 2, Purunsen Bag 1, Tel Case 2 a pe a. Vairengte Block MHIP enkawl Hope Centre hnenah Buhfai Bag 2, Alu Bag 1, Dal Bag 1, Purunsen Bag 1 leh Tel Case 1 a pe bawk. Golgotha Camping Centre-ah hian tun dinhmunah enkawl lai mek hi mi 120 an awm a, Hope Centre-ah hian mi 17 an awm bawk a ni.

Serlui Bial tu MLA Pu Lalrinsanga Ralte chuan khawvel pum ti mangangtu Covid 19 do nan Chief Minister Pu Zoramthanga leh Health Minister Dr.R. Lalthanglianate hmalakna fakawm a tih thu sawiin Mizoram Sorkar chuan a tih theih apiang chak takin a ti zel a, mipuite ei leh barah an harsat loh nan BPL leh AAY mai bakah Worker Welfare member zawng zawngte a thlawnin Ration buhfai pek an ni a hei mai bakah APL zinga harsa zual ten a thlawnin ration buhfai an la tih a sawi a. Mipuite chi ai mai lo tura chahin Mizoram Sorkar chu Zoram mipuite tan a ding tlat dawn a ni a ti.

Pu Lalrinsanga Ralte chuan Covid-19 dona kawnga hlawh pawh beisei lova theihtawp chhuaha hma latu Village Level Task Force te inpekna chu ropui a tih thu sawiin, Kohhran leh tlawmngai pawl hrang hrangin Sorkar an tawiawmna chu a lawmawm hle a ni, a ti a. Frontline-a dinga Mizoram mipuite kan him theihna tura theihtawp chhuaha beitu Village Task Force, Doctors, Nurses, Health Workers te leh Police te inpeknaah lawmthu a sawi a, kan ram leh hnam him theihna tura mahni hrehawm pawisa lova theihtawp chhuaha beitu zawng zawngte beihna chu a ropui hle a ni, a ti bawk.

Serlui bialtu MLA chuan a bial chhung mipuite chu ramri dep maia awm an nih avanga fimkhur tura chahin thenawm State-ah Covid-19 hri vei hi hmuhchhuah mek zel an ni a. Chuvang chuan bial chhung mipuite chu fimkhur a, a tul tawpah lo chuan pawn chhuak lo tura ngenin Sorkar thuchhuakte ngaipawimawh a Village Level Task Force te thu chu zawm hram hram turin a chah a. Mpuite kan him tlan theih nan Sorkarin theihtawp a chhuah thu a sawi bawk.

Pu Lalrinsanga Ralte hian thla hmasa March ni 20 khan Covid-19 dona atan a bial chhung khaw hrang hranga Vantlang hmun lunlaia mipuiten awlsam taka kut an sil theihnan Sintex sawm pariat (18) litre 500 dawng chu pe in Vairengtea Screening Post-a duty te hak atan Surgery Gown piece 70 chu a lo pe tawh bawk. March ni 23 khan a bial chhung mipuite chhuanchham an awmpalha an eitur leinan Serlui bial chhung khua zawng zawng ah Village Level Task Force kal tlangin cheng singkhat (Rs.10,000) theuh a pe tawh bawk a. Heng bakah hian a bial chhunga khaw hrang hrangah buhfai engemawzat a lo pe tawh bawk a ni.