No.3512/2021-2022

Aizawl, the 25thDecember 2021 : Salvation Youth Army, Temple Corps ten kumtin Krismas puala ni 24 zana hun an buatsaih Coffee Nite 2021 chu nizan khan I & PR Minister Pu Lalruatkima’n a hmanpui a ni.

 

Pu Lalruatkima chuan hun kal tawh kan thlir chuan Coffee Nite hi Hnuchham chawmna hmuna awmte tanpuina tura tih a ni fo a, amaherawhchu, nikum atanga Covid-19 hri in min tih buai tak avangin, kan Coffee Nite neihchhan te pawh khalam hawia her hret a ni ta a, hetiang anga Covid natna avanga harsatna leh chhiat tawkte tana buatsaih a ni hian Kohhran bil tan mai he hun hi buatsaih a ni lo tih pawh chiang takin a tilangin ka hria a ni. Chuvang chuan Chhandamna Sipai Pawl (Salvation Army) hian tumah thliar bik nei lova midangte tanpui duhna thinlung nena hun tha in siam hi a hlu hlein ka hre bawk a. Winston Churchill a, British Prime Minister khan, “Mamawhna a awmna apiangah, Chhandamna Sipai Pawl (Salvation Army) chu a awm thin”, a tih hi zanin kan hun hman hian a rawn ti dik hlein ka hria. He hun kan hman hi a Mizo rilru ngawih ngawih hian ka hre hle bawk a ni, a ti.

 

Minister chuan Covid-19 hian keini ram mai ni lo khawvel pum a chawk buai mek a, mihring nunphung a panngngai hleithei lova, kan ram sum leh pai dinhmun thlengin a tuar a, Sawrkar pawhin hmachhawp leh tih duh tam tak kan nei mahse he hri avang hian Sumdawnna te, sawrkar pawisa lakluh te a lo tla hniam nasa em em a, hemi a nih avang hian kan hisap chuan pha mahse a takah thil tam tak kan mipuite tan kan ti hleithei lova, a pawi hlein ka hria. Mahse Pathianin kan harsatna a hria a, hruaitu min pe a, kan duhthusam pawh kan la hlen ngei ang tih hi ka ring tlat a ni. Kan sawrkar tan pawh Kohhran mite te tawngtaipuina zanin hian ka ngen takzet a ni. Covid avang hian chhungkaw tam takin harsatna kan tawk a, nunna hial pawh chan kan tam ta hle a, a pawi takzet a ni. Theih nise “Ka Pa he no hian min pel lul rawh se” ti a ngenin min kalpel thei se tih hi ka duhthusam a ni, amaherawhchu, kan nunah hian kan thu lo em em mai si a, chuvang chuan Covid avanga chhiat tawkte leh harsatna tawkte pawh ka tawrhpui takzet a ni tih hi zanin hian ka sawi duh a ni. Zanin hun kan hmana mi inphal ten sum an thawhkhawm hi tangkai taka

hman a ni anga, harsatna tawkte tan an duhthusam leh an beisei ang diak diak phu hru lo mahse, engemaw tala an harsatna a sutkian theih ka beisei a ni, a ti. 

 

Mipuite chu Krismas hlimawm tak leh duhawm tak hmang theuh turin duhsakna hlanin Lusun leh khawhar chhungte pawhin he Lal Pian cham lo thlengah hian kan thinlungin ama lam en chunga thlamuanna duhawm tak mai kan chan theuh theihnan duhsakna ka hlan bawk che u ni, a ti. 

 

Coffee Nite 2021 hi CAB inkaihhruaina zawh chunga bautsaih niin zaithiam engemaw zat in hun an hmang a. Mipuite tam zawk ten mahni inlum atanga an thlir theih nan LPS, ZONET leh DDK Aizawl in Live in an pekchhuah bakah YouTube ah pawh Live a ni.