Minister of State, Information & Public Relations,  Shri Lalruatkima  chuan vawiin khan I & PR Auditorium-ah Films Division, Government of India leh Information & Public Relations Department tangkawp te buatsaih Mizoram International Documentary Film Festival (MIDFF) a hawng.

Pu Lalruatkima chuan cinema leh film te’n kum 100 chhungin khawvel a chiah hneh hle tih sawiin mihring nun nasa taka nghawngin nunphung a thlak danglam nasa a ti a. Film pangngai nilo documentary film te pawimawhna sawi langin Minister chuan documentary films ten thu leh hla an hawl kim avangte, thawnthu nilo thil tak tak behchhan a siam anih avangtein, an pawimawhna hi a lang chho zel dawn a.  Mipui rilru sukthlek leh an ngaihdan thlengin a her danglam thei a,  chu chu film te thil tih thei zia a ni, a ti a. Mimal, mipui leh khawtlang kaihhruaina leh zirtir kawngah film te chu hmanraw pawimawh tak a nih theih a beisei tih a sawi lang bawk.

Information & Public Relations enkawltu Minister chuan Mizo thalai ten film siamna lamah talent an nei tha tiin chu chu Department pawhin hriain, film tihlar nan te, film siamtu te hmakhua ngaihtuaha an talent tihpun leh an kutchhuak te chawilar kawngah te leh Mizoram in film hmanga hma a sawn theihna kawngah te sawrkar chuan a theih ang angin I & PR Department kaltlangin hma a lak thu a sawi a. Festival hlawhtlinna atan duhsakna hlanin, Minister chuan Festival chhimtu – film siamtute leh he lama tui mite chu an thiamna tihpun kawngah Festival chu hmang tangkai turin a chah a ni.

Thusawitu dang Pu V. Packirisamy, Director, Films Division chuan kum 1948 a din Films Division sulhnu leh hnathawh tlangpui te tarlangin documentary film te chuan thu tak leh a kaihhnawih chiah an buaipui avangin khawtlang dinhmun siamthat kawngah te hmanraw tangkai a ni thei tiin a sawi.  Mizo film siamtu te chu Films Division-in scheme a neih te an dawn ve theih nan dilna te thehlut turin a chah a. Mumbai International Film Festival atana Aizawl chu Hmarchhak a, a ngheta he festival nghahna hmun atan Films Division in 2014 ah an puan chu a takin tih hlawhtlin ngei a tum tih sawiin hemi rual hian kumtin Film Workshop buatsaih pawh an in hawn thu a sawi bawk a ni.  Hmarchhak film siamtute chu film siamna lamah hma an sawn tih sawiin Japan-a Yamagata Film Festival neih mekah  Hmarchhak atangin film 16 chhuah a ni a, chung zinga, Napolean RZ Thanga siam MNF – The Mizo Uprising pawh a tel thu a sawi.

Pi Lallianpuii, Director, Information & Public Relations pawhin thu sawiin Film Festival te hi film siamtu leh buaipuitu te tan thil hlawkthlak tak niin ngaituahna thar leh tihdan phung thar zirna kawngah thil tangkai tak a ni, a ti, a. Documentary Film Festival behchhana, Hmarchhaka film siamtu lar pahnih, award te pawh lo dawng nual tawh - Gautam Bora (Assam) leh Paban Haobam Kumar (Manipur) ten  film siam kawnga zirtirna Master Classes an neih tur chu a bikin ngaipawimawh a, tel ngei turin film siamtute chu a sawm a ni.

Ni thum (3) awh tur Documentary Film Festival-ah hian Award la tawh, Documentary film 20 chhuah a ni dawn a, heng zinga hian Films Division in kum 2014 a Aizawl-ah leh 2016 a Lunglei-ah te Film Making Workshop an buatsaih tuma workshop a tel te kutchhuak - film 7 te pawh chhuah a ni dawn a ni.

Films Division hi 1948 a din niin a tirah chuan Sawrkar programme chungchangah film siamin mipui zirtir hna chu an hna pui ber ani thin a. Mahse chutih rualin documentary film te pawh buaipui chho in film te, documentary te, animation te 10,000 chuang an siam tawh a. National leh International Award engemaw zat an lo dawng tawh bawk a ni.

Attachment

  • Loading attachment...