No.3321/2021-2022

Aizawl, 8th December, 2021: Ministry of Home Affairs hnuai Border Area Development Programme (BADP) Additional Fund 2019-2020 kaltlanga cheng nuai zahnih leh sawmsarih (Rs. 270 lakh) hmanga siam nizung tha chakna hmanga tui pump chhuahna, Mausang Solar Water Pump System, Vaphai a mi chu vawiin tlai khan Rural Development Minister Pu Lalruatkima chuan a hawng. He hun hi East Tuipui bialtu MLA Pu Ramthanmawia, Bamboo Link Road Board Vice Chairman chuan a telpui a ni.

Khuallian RD Minister Pu Lalruatkima chuan Vaphai khuain nizung tha chakna hmanga tui pump chhuahna Mausang Solar Water Pump System tha tak a nei thar chu a lawmpui thu sawiin, nitin mamawh tui hnianghnar zawka an dawn theih nana tangkai taka an hman ngei a beisei thu a sawi a. Sawrkarin mirethei zawk ten leirem an rah theihna turin theihtawp a chhuak mek zel thu sawiin, kum thar lamah Sawrkar flagship programme SEDP kalpui tum  a ni, a ti a. Ramri dep khuate tih hmasawna tih changtlun chu sawkarin a ngaihpawimawh thu sawiin, theihtawp a chhuah zel dawn thu a sawi bawk.

Bamboo Link Road Board Vice Chairman leh bialtu MLA ni bawk Pu Ramthanmawia chuan a bial chhung Vaphai khuain tuilakna tha tak a nei thar chu a lawmpui thu a sawi a. Vaphai khuain an mamawh tak Bazar Shed tha leh changtlung zawk sak tuma bawhzui a nih tur thu a sawi a. Khawtlangin hmasawnna ruhrel thar a neihte chu neitu thinlung pu chunga enkawl thiam turin mipuite a chah a ni.

Mausang Solar Water Pump hi March ni 13, 2021 khan thawh tan niin, June ni 18, 2021 khan zawh fel a ni a. He hna hi Rb.H General Enterprise, Dawrpui, Aizawl ten an thawk a, inremna ang chuan hawn a nih atanga kum 5 thleng a enkawlzui hna an thawk dawn a ni. Work Component 9 kengtelin a panna kawng kilometre 2 vela thui, Sedimentation Tank, Horizontal Roughing Filter, Control Room/Pump House (RCC), Clear Water Sump pahnih, tuilakna pipe metre 1860 a thui bakah,  Electro-Mechanical Component stage pahnihte leh a hungnate a awm a. Tui pump chhuahna hmun Stage 1 atanga Stage 2 kaltlanga khawlua  Water Reservoir thleng tuilakna pipe thui zawng hi metre 1860 a ni a, tui pump tan tirhna leh khawlua tui dahkhawlna Water Reservoir in san hleihna hi metre 405 vel niin, nikhata tui litre 1,92,000 pump chhuak thei tura duan a ni.

Pu Lalruatkima hian tukin khan Samthang khua tlawhin khawtlang hruaitute a kawm a, Samthang khaw tan tui dahkhawlna Water Reservoir siam a nih tur thu a hrilh a ni.

Rural Development Minister hi Pu R.Lalthazuala, Director, RD Department leh Official dang ten an tawiawm a ni.