Nimin tlai dar 4:30 atang khan State Guest House Conference Hall-ah Shri Basab Banerjee, Head Standard & QA, National Shill Development Corporation, Delhi atanga lo kal chu Pu Lalsawta, School Education Minister hovin kawm a ni. He hun hi Pi Esther Lalruatkimi, Secretary, Education Department in a kaihruai a. He hunah hian Pu Lalsawta, Minister pawhin thu tawite sawiin, Mizoram ah thalai lehkhathiamten eizawnna hna tha hmu lovin, Mizoram pawn ah hna zawnga chhuah a tul tamzia thu te sawiin, Mizoten mahni ram chhunga eizawnna hlawk taka an thawh theih nan tanpui an mamawh thu te a sawi.

Pi Esther Lalruatkimi, Secretary, he inkhawmna kaihhruaitu pawhin welcome & introductory a sawinaah Mizoramah vocational education hi SCERT in an buaipui thu sawiin, Pawl XII pass ten duh angin eizawnna hna an hmu mai thei lova. Thalai hna zawng mekte, Employment Exchange a inziaklut Pawl X chin hnuai mi 22000 vel leh 10 + 2 chunglam mi 26000 zet an awm thu a sawi.

Shri Basab Banerjee chuan miin BA/MA pass mahse hna tha hmuh mai a harsat avangin kan nitin mamawh hna chi hrang hrang - Automobile lamte, Agriculture, Horticulture leh eizawnna danga thilsiam chhuak thei tura thalaite zirtirna pek pawimawhzia a sawi a. District tinah chutiang zirna centre hawn nise, sorkar laipuiin sum tam tak a dah a, hman tangkai theih a ni tih a sawi. Vocational Education-a miin thiamna tak a neih chuan pawl XII pass pawhin hlawh tha tak hmuh theih a ni tih a sawi.

Sawihonah ah Pi Esther Lalruatkimi pawhin Mizoram tana hma lak theih apiang bawhzui a tum thu a sawi.

Zan dar 7 ah Cultural Programme te hman hnu in zanriah kilho a ni. He hunah hian Education Department-a mi pawimawh te an kal tha hle.