Vawiin khan Finance Minister Pu Lalsawta chuan Social Welfare Department enkawl Vocational Training Centre Sethawn ah thalaite tan trade pathum – ICT, Automobile leh Electronic Trade-a training kum khat awh tur chu a hawng.

Training hawnna inkhawm VTC Auditorium-a neih ah thusawiin Finance Minister Pu Lalsawta chuan Mizoram Sawrkar chuan thalaiten eizawnna kawng thar an nei theih nan Skill Development hi a ngai pawimawh a, chuvangin hetiang kawngah hian hma lak mek a nih thu a sawi a. Mizote hi Japanese emaw, Korean emaw, American emaw kan nih a ngai lova, Mizo kan nihna ah kan chian a, tumruhna, taimakna leh tuarchhelna ka neih chuan harsatna paltlangin kan tum ram kan thleng thei a ni, a ti a. Mizoram khaw hrang hrang atanga training tur thalai fuankhawm te chu kum khat chhungin theihtawp chhuah a, an Trade thlan te thiam taka zir turin a fuih a. Thiamna an neih that leh chhawrtlak an nih chuan Mizorama chauh nilo hmun dangah pawh hna an thawk thei dawn a ni ti hre reng turin a chah bawk a ni.

Training hawnna inkhawm hi VTC Centre Director Dr. Lalnunthara chuan kaihruaiin Rev. Lalremruata chuan hunserh a hmang a. Kolasib SP Pu C. Lalzahngoa leh Upa K Roseia ten thalaite fuihin thusawina hun an nei bawk a ni.

Tun tum ah Training hi Batch 4-na niin training tur mi 75 inziaklut an awm a, mi 54 vel chu vawiina hawnna programme ah hian an tel.