Vawiin chawhma khan ni 2 awh tur  Mizoram Middle School Teachers' Association (MSTA) General Conference vawi 7-na chu Education Minister Pu Lalsawta'n Vanapa Hall-ah a hmanpui.

Khuallian Pu Lalsawta chuan Zirtirtu kalkhawmte hmaah thusawiin, Education ngai pawimawh tak Chief Minister, zirtirna kawnga tawnhriat ngah tak Parliamentary Secretary leh Education Secretary te nena thawkho kan nih avangin Mizoram Education chuan hmalam hun eng tak a beisei thu a sawi a. Zirtirtu te chu September 5 chauhva chawimawi tur ni mai lovin an pawimawhna leh zahawmna mipuiin kan hriatpui a pawimawh thu a tarlang a, zirtirtu te chu an hlutna leh zahawmna vawng nung zel turin mimal tinin inpumpekna nen tan an lak zual sauh sauh a ngai a ni, a ti. Industry lian tak leh khawl changkang tak tak kan la nei theilo a nih pawhin kan ban phaka awm Education ah hian tihtak zetin tan la tlang i la, kan sawrkar sikulte hi kan faten zirna tlaka an ngaiha, private sikul min pan san loh nan sawrkar pawhin theitawp a chhuah ve  mek zel a ni, a ti bawk. Tun atanga reilo teah chuan kan zirlaite hian sawrkar sikul hi an lo pan leh sup sup tawh ngei a beisei thu a sawi tel bawk.

MSTA General Conference ni khatna hi Sr. Vice President Pu C.Thantluanga'n a kaihruai a, Conference-ah hian thupui atan Quality Education hman a niin chawhnu lamah rorelna te neih a ni.