Kolasib Assembly bial chhunga Model Village Meidum khua a hmalak dan tur leh hemi atana Department hrang hrang tena Action Plan an siam, Meidum khaw mipuite hnenah pharh leh an pawmpuina turin vawiin khan BNRGSK Hall, Meidum ah MIFCO Chairman leh bialtu MLA ni bawk Pu P.C. Zoram Sangliana hovin Gram Sabha neih a ni.

Gram Sabha ah hian Pu P.C.Zoram Sangliana chuan hmasawnna ruhrel siam leh din chu hmasawnna chikhat chauh anih thusawiin kan rilru sukthlek leh ngaihtuahna, thianghlimna leh hriselna kan ngaihpawimawh danteah hian hmasawnna tur tam tak kan nei theuh a, hengah te hian mahni atanga bultan a midang te zirtir hi a pawimawh ber a ni, a ti a. Mimal in thil tha atana hma kan lakte chu chhungkua leh khawtlang tan thil tha leh tangkai a ni thin a ni, a ti bawk. Hmasawnna bul chu mihring-ah a awm thusawiin taksa tana thalo, zuk leh hmuam, zu leh ruihtheih thil te basan hi mimal nunah hmasawnna a ni, a ti a. Meidum khaw mipute chu midangte tan harsatna siamtu nilovin midangte malsawmna ni turin a fuih a, khawtlang hmasawnna leh tan zelna atan mipuite chu inlungrualna tha leh thawhhona tha nei reng turin a chah bawk a ni.

Kolasib DC Pu Jitender Yadav pawhin thusawiin Model Village ina a tum ber chu hmasawnna lian tak tak siam a ni lova, mihring ina kan nitin nun atan kan mamawh thil hrang hrang ei leh bar, hriselna, zirna, thianghlimna, eng leh tui te mipuite hnenah changtlung leh tha zawka pek leh ruahman a, an rilru leh ngaihtuahna te siam that a ni, a ti. Pi Maria CT Zuali, Director SIRD chuan mipui kalkhawmte chu Model Village in a tum te a hrilhfiah a. BDO Bikhawthlir Pu Lalfakzuala kaihhruai Gram Sabha ah hian Department hrang hrang ten Village Development Plan hnuaia an Department hmalak tum dan chu khaw mipui kalkhawmte hmaah an pharh a, mipui lamin an duhdan te an sawiho hnuin, Action Plan an siam te chu an pawmpui a ni.