Vawiin khan Art & Culture Minister Pu P.C. Zoram Sangliana chuan Vanapa Hall-ah ni nga awh tur(1st - 5th September) Regional Painters' Camp chu a hawng a. He Camp hi Lalit Kala Akademi, Regional Centre, Kolkata leh Art & Culture Department tangkawpin an buatsaih a ni.

Pu Zoram Sangliana chuan 'Visual Arts'(Lem ziah leh a kaihhnawihte) lamah Mizoram hi kan la sang lo hle a tiin Lalit Kala Akademi te chu in hawng taka Mizorama lem ziak mite, an hnathawh tih changkan leh tih changtlun theihna turin programme hrang hrang buatsaih zel tura a beisei thu a sawi. Pu Zoram Sangliana chuan hetiang Camp neih hian state hrang hrangte inkara inunauna, inngainatna leh inhriatthiamna te chu a hring chhuak thin a ni tiin India ramah hnam inpumkhatna atan hmanrua pawimawh tak a nih thu a sawi.

Lalit Kala Akademi hi 'Visual Arts' tana, Central Sawrkar a din a ni a. Regional Centre Kolkata chuan kum 1999 atangin vawi li lai Mizoram ah Art Camp leh Art Worshop te an lo buatsaih tawh nghe nghe a ni. He Regional Painter' Camp ah hian Mizoram bakah Manipur, Assam, West Bengal leh Tripura atangin lemziak thiam, mi sawm an tel a. Lem ziak thiam Mizoram aiawh he Camp a tel te chu - Laltlanmawia, Saitluanga Sailo leh Lalremruata Ralte te an ni.

Regional Painters' Camp hawnna inkhawm ah hian Pu Ngurbiaka Joint Director Art & Culture Department leh a thawhpui dangte, Shri Siddhartha Ghosh, Regional Secretary Lalit Kala Akademi Regional Centre Kolkata leh Mizorama lem ziah lama hming lo chher tawh, lem ziak mi engemaw zat an tel bawk a ni.