Mizoram State Child Protection Society, Social Welfare Department leh Aizawl District Legal Services Authority tangkawp chuan vawiin khan 'State Level Orientation Training for Child Welfare Committees on the Juvenile Justice (Care & Protection of Children) Act, 2015' tih thupui hmangin Aijal Club-ah District hrang hranga CWC member te leh District Child Protection Officer (DCPO) te tan Training buatsaih a ni a. Pu P.C Lalthanliana, Minister, Social Welfare Department chu khuallian niin, Pu P. Lalchhuanga, IAS, Secretary to Govt. of Mizoram, Social Welfare Department chuan hawnna inkhawm hi a kaihruai a. Pi Lalduhawmi, Secretary, District Legal Services Authority chuan training chungchang sawihawnna a nei.

Pu P.C. Lalthanliana chuan Observation Home awm sa Aizawl, Lunglei leh Champhai bakah District dangah Home thar hawn a nih tur thu sawiin, home hawn nan hmalakna kalpui mek a ni a May thla ah chuan hawn hman a nih tur thu a sawi a. Minister chuan, JJ Act ti hlawhtling turin department-in nasa takin hmalakna a kalpui thin thu sawiin, chutah chuan mi thiam tak tak ten hna an thawk mek a ni a ti.

Minister chuan Dan chu a nihna anga hman tur anih thu a sawi rualin khawngaihna dan pawh kan hman zeuh zeuh a tul a ni a ti a. India ram danpui khauh tak hnuai ah pawh khawngaihna dan a awm ang hian Kristian kan nih na hian khawngaihna dan hi kan hman a tul chang a awm thin tur a ni a ti.

Vawiin training ah hian dan lama mithiam Pu H. Lalduhsanga, Civil Judge/ Judicial Magistrate, Pu T. Lalnunsiama leh Pi Lalfamkimi Advoacate ten naupang pual bil dan thar Juveline Justice (Care and Protection of Children) Act, 2015 tunhnai maia chhuak thar hman dan zirtir an nei a. Pu Mahendrasingh M. Senghar, Convener - North East for Child Rights chuan India ramchhunga naupang humhimna chungchang a zirtir a, Dr. Bijoi Jacob, Antara Rehabilitation Home, Kolkata in naupangte rilru hriselna kawnga harsatna chungchang a zirtir bawk a ni. Training hi naktuk hian chhunzawm leh a ni ang.