Vawiin khan cheng vaibelchhe 6 senga sak Tribal Art Centre, Tanhril ami chu Social Welfare Minister Pu PC Lalthanliana’n a hawng.

Minister chuan hnam rotling, Mizo hnam culture kaihhnawih thil hrang hrang pholanna tur hlawhtling taka hawn a ni ta chu lawmawm a tih thu a sawi a. Mizo infiamna chi hrang hrang neihna atana hman tur  Tribal Art Centre, Social Welfare Department hmalakna a peihfel a lo ni ta hian he Department-in Mizoram hmasawnna atana kawng tinrenga hna a thawh nasatziaa tilang chiang hle a. He Department hian zirna lam te pawh Education Department ang maia enkawlin tunah hian mirethei zawk ten a thlawna zirna tha an neih theihna tur Eklavya School pawh Lungleiah din a ni a, District dang 3 ah pawh din tum mek a ni, a ti a. Serchhip a he sikul hawnna tur DPR pawh sorkar laipuiin a pawmpui tawh a ni, a ti bawk. Khawtlang nun leh hnam nun siam thatna kawng hrang hranga thawkin Social Welfare Department hian nu in nau a pai atangin naupang te ei tur tha pek kawngah te, pianphunga rualbanlo an lo nih palh pawha enkawlna bakah tar pension thlenga a pek zui thu a tarlang a. Mizorama la awm ngai lo, hnam infiamna leh culture pholanna tur atan liau liau a duan Tribal Art Centre tha tak peihfel tak pawh hi Department hotute thahnemngaihna avang anih  thu sawiin tangkai taka Mizoram mipui ten an hman ngei a beisei thu Minister hian a sawi a ni.

He inkhawma khual zahawm, bialtu MLA Pu Lalduhawma pawhin hnam rohlu tling pha a bial chhunga sak a ni chu lawmawm a tih thu sawiin bial chhung mipui te pawhin mahni ta anga cheibawl a, tih hmelhem phal lo turin a chah a. Tribal Art Centre hawn a nih hma a Assembly Assurance Committee member anga  a lo tlawh tawh thu sawiin lungawithlak viaua an hriat thu a tarlang a ni.

Hnam infiamna (indegenous games) leh hnam lam leh zai a ni emaw, hnam kaihhnawih thil reng reng pholanna hmun tur  Tribal Art Centre hi 2006 a sak tan niin cheng vaibelchhe 6 senga sak zawh a ni a, a sakna tur sum hi sorkar laipui Tribal Affairs Ministry atanga hmuh a ni. Khawthlang nunin a chiah hneh tawh Mizo thalaite zingah hnam infiamna leh hnam thil chi hrang hrang an theihnghilh mai loh na tur leh humhima, tihhmasawn a nih theih nan he Centre hi sak a ni a. Tangkai zawka mipuiin an hman theih nan Mizo hnam infiamna chi hrang hrang bakah tunlai infiamna pawh la tih theih zel tura ruahman niin Social Welfare Department lamin a hman dan tur mumal takin a la duang ang.

Tribal Art Centre hi Open Air Theatre, 73 x 46m a zau a ni a, Mizo infiamna chi hrang hrang insuknawr, saihruipawh, sukkhawh, lunginchawisiak, lung indensiak, kalchhet leh a dangte neih theihna tura duan niin infiamna tualzawl hi Boulder  leh sand filling hmanga siam a ni a. VIP thutna bakah entu mipui mi 2400 lenna Gallery 4 in infiamna tualzawl hi a hual a. Motor 24 dah theihna Parking Area tha tawk tak siam niin infiam mite riah mai theihna tur Dormitory leh Locker room bakah Administrative Office leh Security Room siam tel a ni bawk.

Tribal Art Centre hawnna inkhawmah hian Minister Pu Nihar Kanti Chakma, Parliamentary Secretary Pu H. Zothangliana, ZIDCO Chairman Pu VL Robiaka, Law Commission Chairman Pu R. Lalrinawma leh MLA Pu K Lalrinthanga te an tel a. Inkhawm hi Social Welfare Department Secretary Pi B.Sairengpuii’n a kaihruai a ni.