MIFCO Chairman leh Kolasib Bialtu MLA ni bawk Pu P.C. Zoram Sangliana’n vawiin khan Diakkawn YMA Hall ah Government Kolasib College in zirlai thar inlawmluhna ni Freshers’ Social an buatsaih chu khuallian niin a hmanpui a, he hunah hian College Annual Magazine a tlangzarh nghal a ni.
Pu P.C. Zoram Sangliana chuan tunlai Mizo thalai te chu an chhuanawm a, hmuh an nuam a, hun lo kal zel turah pawh beiseina nghahtlak an ni a tiin tunlai thalai te hian nakina ram leh hnam hneh taka an kaihhruai a beisei tlat thu a sawi a. Department thenkhata zirtirtu indaih lohna chungchang an hriattir chu lawmawm a tih thusawiin mipuiten an mahni aiawh tura an thlan tlin te hnenah hian hlenchhuah tura an sawi leh an tiam te hi an hrilh nawn fo a tha a, za a za chu theih vek loh mahse engemaw chen kawng ro a su thei a ni, a ti.
Pu P.C. Zoram Sangliana chuan Mizorama HIV/AIDS darhzau zel chu MLA rual ten an vei thusawiin hemi dona tan MSACS te tha ti chak turin MLA tinin cheng nuai khat an thawh thu a sawi a. Zirlai naupangte chu an nun fimkhur turin leh he natna ti rem leh ti tlem tura an ngaihtuahna te seng a, theihtawp chhuah turin a chah a ni. Mizo hnam zia leh incheina te chu ngaisanga, chawinunga, chawivul zel turin zirlai naupangte chu chahin an theihna apianga Mizo incheina uar a, pholang thin turin a fuih bawk a ni.
Khuallian chuan mithi kan sawngbawl dan, chhiat tawk chhungkua te in kan bawihsawm dan leh vuina programme kan kalpui leh tih mek te hi a aia tha leh mite tana hun leh tha senna tlem zawkin leh midang te tana harsa lo zawka tih dan kawng ngaihtuah a hun tawh tih sawiin hemi atan hian ngaihtuahna kan hman a hun tawh hle a ni, a ti a. Zirlai naupangte chu nakina ram nghahfak an ni tih hre renga eng angin nge ram leh hnam tan hma leh tan ka lak thei ang tih ngaihtuah thin turin leh thil an tih reng reng chu tih chi a ni em tih te in zawt fo thin turin a chah bawk a ni.
Bialtu MLA chuan he hunah hian Government Kolasib College Annual Magazine a tlangzarh nghal a. University Graduate Exam a zirlai naupang 3 Top Ten a lang te hnenah lawmpuina thuziak a hlan a. Excursion an kalna tur sum an indaih lohna cheng sing 3 an dil chu zirlai hruaitute kutah a hlan bawk a ni.
Freshers’ Social ah hian Principal Pu BS Thapa leh Kolasib College Teachers’ Association aiawh te pawhin thusawiin zirlai naupangte fuihna hun an hmang bawk a ni.
Government Kolasib College ah hian zirlai naupang 483 leh zirtirtu 54 an awm mek a. Kumina University Exam Result-ah B.A. ah First Division 18 leh B.Sc. ah First Division 5 an nei a. Mizo subject a 6-na, Education subject-a 3-na leh Botany subject-a 3-na te hauhin Toppers 3 an nei a ni. Kolasib College ah hian BA leh BSc course bakah BCA Course pawh an kalpui mek a ni.
