Transport Minister Pu PC Zoram Sangliana chuan Sawrkar laipui-a Inland water Transport Ministry chuan Mizoram in Lui hmanga thil thiar velna hna a thawh dan an rawn endik na-ah lungawi thlak an ti a, an huntiam pawh hmang zo lovin India rama hnathawk tha 5 zingah Mizoram min dah kai a ni , a ti.

He thu Awithangpa Group YMA Conference vawi 5 na, Kawnpui Town Hall-a neih ah nizan khan Khuallian niin a sawi a. Minister chuan, Bairabi atanga Sairang inkar Tlawng lui dung-a Lawng kal theih nana siam a that avangin Sawrkar laipui chuan Tuichawng leh Khawthlang tuipui inkar pawh Lawng kal nana harsa zawng zawng thianfaiin Lawng kawng tur siam leh mek tum a ni a ti bawk. Art & Culture Minister ni bawk Pu PC Zoram Sangliana chuan Mizoram in Cheraw hmanga World Record kan siam kha, kan hmingthanna leh khawvela hriat kan nihna tur chauh a ni lo a. Tunah hian Zoram khaw kilkhawr ber thlengin Hnam lam in kan rilru a rawn tiharh thar a; chu chu World record tluk zetin a hlu a ni a ti a. Hnam dang ten an Hnam incheina leh lam an zahpui ngai lo a, mi lian leh hausa ten an uar zawk mah a ni tiin Mizo te pawhin kan zahpui loh a pawimawh a. Officer leh mi hausa ten bul tan thei sela chuan tun ai hian kan Culture hi kan chawi lar ang, a ti a. Kan Hnam incheina leh chin dan hian Mizo hnam peng hrang hrang te min tipumkhatin min thlungkhawm se a duhawm hle a ni, a ti a ni.

He Conference hi Nilaini zan khan Pu Hmingdailova Khiangte MLA leh Chairman Mizoram Youth Commission chuan Khualzahawm niin a hmanpui bawk a. Thu sawiin, Mizo zingah Ei tur mamawh avanga thawh tur zawng lo leh hna thawhna hmun lam pan tum si lo, pawisa fai zawng a vak kual kan pun zel chuan kan la chhiat phah thei a ni a ti.

Awithangpa Group YMA Conference hi Thawhlehni zan atang khan tan a ni a. Nizan khan tluang takin a tiak a. Branch 13 awmna Group YMA hian Vantlang hriselna lama hmalak relin Health Deptt leh Social Welfare Deptt ten naupang leh Nu naupai hriselna atana hna hrang hrang an thawh te chu theih ang anga thawhpui an tum a. Khawthlang lama misualin mi 5 an rukbo chu demin phut nei lova chhuah turin an rubotute an ngen a, Sawrkar leh Central YMA hmalakna an thlawp tlat thu an passed bawk.