Pu PC Zoram Sangliana, Transport Minister chuan vawiin khan Tourist Lodge, Chaltlang-ah Mizoram Maxi Cab Owners’ Association khawmpui vawi 10 na a hmanpui. Pu Lallianmawia, SP Traffic chu khualzahawm niin inkhawm hi Pu R Lalhmunmawia, President MMCOA in a kaihruai a ni.

Pu Zoram Sangliana chuan Maxi cab te hian bus tlan theih lohna thingtlang khuaah te tlanin thalai tam tak ten eizawnna an neih phah a, bakah zinmite tan chauh malsawmna nilovin loneitu mahni tharchhuah thlai zuartute tan pawh malsawmna an ni tih an hre lovang tih a hlauh thu a sawi a. Minister chuan Maxi cab drivers te chu a tlangpui in an tlan chak a, anmahni leh midang nunna an kutah a awm tih hriain englai pawhin fimkhur reng turin a ngen a. April 2008 atanga December 2012 chhung khan Mizoram accident, a te leh lian tum 509 thlengin mihring nunna 345 chan a niin hliam 991 record anih thusawiin, Minister chuan nunna chan hi lirthei khalh dan ah fimkhur lehzual ila a tam zawk hi chu pumpelh theih anih ngei a rin thu a sawi. Pu Zoram Sangliana chuan dan bawhchhiatna avanga hremna awm thei hrang hrang Maxi Cab khalhtute a hrilh a, zawm ngei turin a fuih bawk. Hawihhawm, motor khalh thiam leh tlawmngaihna kawngah Mizo driver te an fakawm laiin, Minister chuan fimkhurna kawngah erawh chuan tan lak a ngaih thusawiin ruihtheih thil leh lirthei khalh chawhpawlh ching driver engemawzat an la awm chu pawi a tih thu a sawi bawk.

Mizoram Maxi Cab Owners’ Association hi 1997 khan din a ni a, tunah hian Mizoramah Maxi Cab 1800 vel awm in, nitin Aizawl lut a service hi 600 vel a ni.Vawiin inkhawm ah hian member thite sunna hun hman a ni a, chawhnu inkhawm ah hruaitu thar thlanna neih a ni.