Transport Minister Pu PC Zoramsangliana chuan vawiin khan a bial chhung Bairabi leh Meidum khuaa Bharat Nirman Rajiv Gandhi Seva Kendra BNRGSK building sak thar te a hawng. Heng building te hi Ribbon chep chata hawngin Minister chuan ram leh khawtlang hmasawnna hmanraw pawimawh tak an nih thu a sawi. Kolasib Project Director, DRDA hnuaiah Bilkhawthlir BDO kal tlangin khawtlang VC ten building tehi an sa a. Hnathawhna tur room hrang hrang awmin Computer Room leh Meeting neihna tur te pawh a awm a, bathroom pawh awmin heng In tehi a sak hmang a tha hle a ni.

Pu PC Zoramsangliana chuan, VC te hi khawtlang thatna leh thatlohna thilah thui tak mawhphurtu an ni, a ti a.Khawtlang tana hna in thawhna kawngah in iptea sum in lo ah pen a tullo a ni, a ti a. Tuna VC in sak thar chu kawng tinrengah khawtlang mipui te inlungrualna leh in pawhna thlentirtu a nih ngei a rin thu pawh a sawi a ni.

Meidum khaw mipui te chu hun reilotea India ram leh khawvel hmun dang tena Mizote min la hriatna tur Gas laihchhuahna hmun kawltu an nih avangin an dinhmun a neu lo hle a ni, a ti a. Khawvel Gas Map –ah in la chuang ngei dawn a ni, a ti a. He gas khurah hian mithiamte chuan Oil a awm ngei an ring bawk a, ala ropui viau dawn a ni, a ti a ni. Bairabi khaw mipui te pawh ramri depa awm an ni tih inhre reng chunga mawi taka nung tur leh ram leh hnam hmangaihna rilru pu fo turin a chah a. Hna engpawh thawk se, ka ram tan tichung zela thawk fo tur leh mahni hnam leh unaute kawng engkima in tan tlat fo turin a chah a, tin Minister chuan an ram te mihausa leh pawnlam mite kutah hralh chhawng lo tur leh venghim tlat turin a chah bawk a ni. 

He hunah hian BNRGSK kawtah thing mawi Pu PC. Zoramsangliana leh Pi Maria CT Zuali, Project Director ten an phun a ni. Bairabi khuaa BNRGSK building sak hi cheng nuai 9 leh sing 7 senga sak a ni a. Meidum ami hi cheng nuai 7 leh sing 9 senga sak a ni.

Minister hi Pi Maria CT Zuali, PD, DRDA, Pu Lalchungnunga, BDO, Bilkhawthlir, Er. F. Sanglura EE, PHE, Pi Lallianpuii, DIPRO leh midang thahnem takin an tawiawm a ni.