Pu R. Lalrinawma, Deputy Speaker chuan vawiin khan I & PR Conference Hall-ah Mizoram Consumer Union leh State Commission tangkawp buatsaih Workshop on Consumer Rights & Protection a hawng. Hawnna inkhawmah hi Pu K. Thanglura, President, Mizoram Consumers Union in a kaihruai a. Justice B.P. Katakey, President, State Commission, Aizawl chuan thupui hawnna a nei. He Workshop ah hian Kolasib, Serchhip, Champhai leh Mamit atangin Consumer Union hruaitute an lo kal a ni.

Pu R. Lalrinawma chuan mipuite hian kan chanvo leh kan hamthatnate hi kan hriat chian viau a, Consumer Court te hi kan hman tangkai thiam a ngai a ni, a ti. Pu Lalrinawma chuan mi thil tih dik loh kan zeppui avangin consumer te hian harsatna kan tawh phah thei a. Hei hi kan sim a ngai a, a dik lo deuh tih hre reng chunga a awlsam zawk zawnga sum tlem chawibelh a thil kan ti mai thin pawh hi kan sim a ngai tawh a ni, a ti bawk. Consumer Union hruaitute chu mipui tana thahnem ngai taka thawk a, midang tana malsawmna ni turin a chah a ni.

Chawhnu lamah Pu Singthanga, President, Aizawl District Forum chuan Service Deficiency chungchang te; Pu Rinchhunga, Advocate & Adviser MCU leh Pu V.L. Nghaka Keivom, Advocate & Executive Member, MCU ten Consumer Rights & Protection chungchang sawi hawnna an nei.