Vawiin khan Secretariat Conference Hall, New Capital Complex, Khatla-ah Pu R. Lalzirliana, Rural Development Minister hovin Rural Development Department-a Officer leh BDO zawng zawngte nen Meeting pawimawh tak neih a ni. Meeting-ah hian RD Department in scheme hrang hrang a kalpui mek chungchang sawihona neih a ni a. BDO te hnen atangin an Block huamchhunga an hmalak dan tlangpui leh harsatna an tawhte ngaihthlak a ni a. RD Programme hrang hrang- NREGA, BADP, BRGF, IAY, SGSY, IWDP leh NLCPR kalpui dan, hlawhtling leh felfai zawka thawh dan tur leh mipui chhawr tangkai theih tur hna ruahmanna siam chungchangte ngaihtuah leh sawiho a ni bawk.

Pu R. Lalzirliana, Minister chuan RD Department Officer leh BDO zawng zawngte chu Scheme hrang hrang an kalpui danah ram darthlalang leh mipui rawngbawl an nih inhre renga rintlak leh dan ang taka thawk turte, mipui chanai ti chingpen lo leh eirukna laka inthiarfihlim turte, biaknuam leh State dang tan pawha entawn tlak a thawk turin a fuih.

Pu Vanengmawia, Secretary in Rural Development Programme hrang hrang a BDO te mawhphurhna sawiin BDO level-a sum tam tak a awm avanga fimkhur a tul thu te, Department-a sum hman dan fello awm nia puhna awmte chhui anih mek thu leh thil awmdan dik tak hriatchian thuai a nih tur thu a sawi a. Hetiang ang thil hi Block level-ah pawh lo enzui theuh turin a chah a ni.

Meeting-ah hian RD Scheme hrang hrang kalpuina kawnga hmasawn dan tur thil pawimawh hrang hrangte sawiho a ni a, zawhna leh chhanna hun hman a ni a. Job Card lem zawnchhuah dan turte, khawtlang tana rotling siam tura NREGA kalpui dan turte, IAY Permanent Wait list dik tak leh rintlak neih a nih theih nana hmalak dan turte sawiho a ni a. Heng bakah hian Department inrelbawlna leh scheme kalpui kawnga thil tul leh pawimawh tak takte sawiho  a ni.

Minister hi Secretary bakah Joint Secretary, Director, Rural Development Department, Project Director, SLMC & IAC leh Department Officers ten an tawiawm a ni.