2182/2023-2024

Aizawl the 6th October, 2023: Tukin khan Pu R. Lalzirliana, P&E, Art & Culture etc. Minister leh bialtu MLA ni bawk chuan Thingsulthliah Football Playground Retaining Wall chim vanga field zauh nana leivung an hnawh chim chu a hmunah Disaster Management & Rehabilitation (DM&R) Director te nen siamthat dan tur enfiahin an tlawh.

Football Playground zauh nan hian VC te'n field awmsa chu rawt hniamin retaining wall te siam a ni a. Tunhnai khan retaining wall chu chimin luikawr a hnawh avanga tui tlingin Presbyterian English School (PES)-ah harsatna a thlen a. School chhungah hian tui lutin School hi tunah hian khar anih phah a ni.

Tun maia hmalakna hmasa a tan tui tling chu paih fai a, drain vek dan tur ngaihtuah ni se tih a ni a. Fur a reh hunah siam that leh dan tur ngaihtuah ni se tiin tunah hian Thingsulthliah VC te'n a siam thatna tur estimate cheng nuai 35 vel an siam chu DM&R hotute nen an enho nghal a ni.

Minister hi Thingsulthliah BDO bakah khawtlang hruaitute'n an tawiawm a ni.