Vawiin chawhma dar 11:00 khan Assembly Speaker Pu R. Romawia’n Mizoram Nursing College Graduation & Lamp Lighting Ceremony vawi 22-na Tourist Lodge-ah a hmanpui. He College Principal Pi Lalbiaksangi chuan kum 1980-ah Nursing School hi din anih thu leh General Nursing Midwifery (GNM) 500 lai lo passed tawhin, kum 2005 atangin B.Sc Course tan a ni a, a Institution pawh ‘Mizoram College of Nursing’ tia thlak anih thu leh an College kalpui dan report a pe a.

He Graduation & Lamp Lighting Ceremony hmangtute chibai bukin Speaker Pu R. Romawia chu he hun bik pawimawh tak hmanpui tura an sawm ve avanga a lawmthu te a sawi rualin Speaker chuan, Principal leh Staff te thawhrimna chu fakawm a tih thu a sawi a ni. Tunlai khawvelah sum duhna avangin mihring hlutna kan hloh mek a, heng hunah hian mahni zahawmna hum tura kan rilru put hmang kan siam that a pawimawh thu sawiin, ram dang leh State dangah te pawh thawk tlaka Trained leh chherchhuah an nih tawh avangin an thawhna apiangah rinawm leh taima taka thawk turin a fuih a ni. A sawi zelnaah Speaker chuan, Nurse hna chu hna zahawm anih zia sawichhuakin, a zahawmna leh hlutna chawisang zel tur chuan thawktute an pawimawh a ni a ti a. Nursing Trained chhuak te chu an tawngkam leh chetzia-ah te hawihhawm taka an enkawl damlo te tan thlamuanna leh beiseina hlimawm thlentu ni zel turin a fuih a. An thawhna apiangah Missionary rilru pu-a Florence Nightingale anga mite tana Malsawmna leh damna thlentu ni zel turin duhsakna a hlan a ni.

Speaker Pu R. Romawia hi Assembly Joint Secretary bakah Health & Medical Education Deputy Director leh Staff te bakah Mizoram College of Nursing Principal leh Staff te leh Graduate thar nu leh pa tam takin an tawiawm a ni.