No.706/2021-2022

Dated Champhai, the 28th May, 2021: East Tuipui Assembly Constituency bialtu MLA Pu Ramthanmawia, Bamboo Link Road Board Vice Chairman ni bawk chuan vawiin khan a bial chhunga Damdawiin Primary Health Centre (PHC) pali- Farkawn, Khawbung, Bungzung leh Sesih PHC te hnenah tul leh pawimawh apianga hman turin sumfai Rs 25,000/- theuh a pe. Sumfai hi PHC awmna khuaa MLA aiawh leh khawtlang hruaituten Medical Officer theuhte hnenah an hlan a ni.

Pu Ramthanmawia chuan, “Bial chhungah hri kai hmuh chhuah zeuh awm mahse, damdawi lama thawktute leh VLTF te thawhrimna leh inpekna zarah Pathian humhimna kan chang zel hi a lawmawm tak zet a ni", a ti a. Sorkar Official-te, damdawi lama thawktu PHC, Health & Wellness Centre, Sub-Centre leh Clinic hrang hranga thawktute leh VLTF te thawhrimna leh inpekna chu fakawm a tih thu a sawi bawk.

Bialtu MLA chuan Covid-19 hripui leng mek karah bial mipuite chu fimkhur tura chahin, bial, khua leh mimal tinte him tlan zel theih nan Sorkarin inkaihhruaina a siamte tha taka zawm tur leh Sorkar hotute, Health lama thawktute leh VLTF te thu zawma fimkhur thiam turin bial mipuite a chah a ni.

PHC a thawktu Medical Officer leh Staff-te chuan bialtu MLA in a ngaihsakna chu lawmawm an tih thu leh, PHC mamawh leh thiltul pawimawh awm apianga rang taka hma lak sak zung zung thintu bialtu MLA neih chu thlamuanthlak an tih thu an sawi bawk.

Pu Ramthanmawia hian PHC palite hnena sumfai a hlan bakah hian tun hnai khan East Tuipui bial chhung khaw hrang hrangah, Buhfai bag 270 leh khaw hrang hrang VLTF te hnenah sumfai Rs 183,000/- a lo sem chhuak tawh bawk a ni.