2685/2022-2023
Champhai, the 16th November, 2022: Nimin khan Bamboo Link Road Board Vice Chairman Pu Ramthanmawia, East Tuipui bialtu MLA ni bawk chuan Farkawn Water Supply Scheme (Solar Pumping) siam hna thawh dan tur leh Farkawn Playground-a Artificial Turf (Phullem) phah dan turte a hmunah kalin a enfiah.

Pu Ramthanmawia chuan cheng nuai 450 senga Farkawn Public Playground-a phah tur Artificial Turf chu Special Assistance to State for Capital Investment (SASCI) 2022-2023 hnuaia thawh tur anih thu a sawi a. Bial kilkhawr tak ni a sawi thin East Tuipui Constituency-ah a hmasa ber ni tura phullem awmna inkhelhna hmunhma nuam leh tha tak siam a ni tur chu lawmawm a tih thu a sawi bawk.

Pu Ramthanmawia chuan sawi chhunzawmin NABARD Rural Infrastructure Development Fund- XXVII hmanga thawh tur Farkawn Water Supply Scheme (Solar Pumping) chu cheng vaibelchhe 16 chuang senna tur a ni a ti a. tiau luipui pump tur niin, nikhatah tui litre nuai 4 zet pump thei tura duan a ni a ti a. Mi pakhatin ni khatah tui litre 70 zel dawng thei tura ruahman a nih thu a sawi bawk.

Pu Ramthanmawia chuan Tiau atanga tuilakna a hlawhtlin hunah chuan thal laia Farkawn khawpui tui harsatna chu sutkian anih tawh tur thu sawiin, Farkawn mipuite'n fur leh thalah tui hnianghnar tak an neih theih tawh dawn avangin a lawmpui takzet thu a sawi a, kum tharah hna tan theih thuai a beisei thu a sawi bawk.

Pu Ramthanmawia hi Pu C.Zothansanga, SDO PHED Khawbung WATSAN Sub-Division leh a thawhpuite bakah Farkawn khawtlang hruaitute'n an tawiawm a ni.

East Tuipui bialtu MLA hian Farkawn PHC sak mek leh zirna in hrang hrangte tlawhin an dinhmunte a enfiah nghal bawk a. Thawktute chuan mamawh leh harsatna an tawhte chinfel anih theih nana bialtu MLA hmalakpui thinnaah lawmthu an sawi a ni.