Vawiin chawhnu khan Home Minister Pu R.Lalzirliana chuan Vanapa Hall-ah Chapchar Kut Miss 2016 atana thlante lawmman hlanna hun a hmanpui.

Khuallian Pu R.Lalzirliana chuan Mizo nula, Mizo thuam ngei inbel zing atanga Chapchar Kut Miss thlan chu tih dan tha tak nia a hriat thu sawiin, chuti ang ngaihtuah nachang hria Diktawn Monthly Magazine neitu Pu Lalhmachhuana Zofa leh a thawhpuite a fak a. Sum leh paia thlawptute pawh fakin, mite tana luang chhuak tura hma lakna hi a ropuiin a Mizo hle a ni, a ti. Home Minister chuan hmel tak tak awmna chu pawn lam ni lovin thinlung a ni tih hria a, en maia tha ni ringawt lo va, thinlung thianghlim leh tha nih tum tel tlat turin Miss atana thlan tharte chu a fuih a. Mizo pi pute tlawmngaihna, huaisenna leh aia upa zah thiamna te chhawm nungtu, mite pawhina ‘Chapchar Kut Miss-a thlan awm reng a lo nih hi’ an tih tur mi, ram leh hnam tana malsawmna thlentu nih tum tlat turin a chah bawk.

Khual zahawm Pi Lal Riliani chuan Chapchar Kut Miss thlan thin chuan Kut hman pawh a tiphurawm sawta a hriat thu a sawi a. Fai, hrisel leh hmel tha tak ni tur chuan hriselna tibawrhbang a, tul lova sum tam tak mi sentirtu vaihlo leh a kaihhnawih laka fihlim a pawimawh thu sawiin, Miss atana thlan tharte pawh anmahni an fihlim mai duh tawk lo va, mi dangte zirtirtu ni zel turin a chah bawk. Ei leh ina fimkhur a tulzia sawiin, Pi Lal Riliani chuan taksa tana tha lo tur chu thlah hmak a, taksa tana tha chauh ei thin hi hriselna leh hmel thatna a nih thu a sawi.

Pu Lalhmachhuana Zofa chuan inlawmna thu a sawi a. Mizo hmeichhiate zahpuiawm bik lohzia pho lan nan Miss Chapchar Kut chu thlang thin an nih thu sawiin, thlan chhuahte chu danglam nghal thut tura beisei tur an ni lo va, a tha lam kawnga hma sawn tur erawh chuan an inzir zel ang, a ti.

Miss Chapchar Kut 2016 hi judge 8 leh scout 27 te’n an thlang a. Kumin Miss Chapchar Kut atan hian mi panga thlan chhuah niin, pakhatna chu Aizawl Venglai nula Lalnghakliani a ni. Ani hi SIPMIU chuan an Ambassador atan an hmang nghal ang.