No.3352/2021-2022

Aizawl 10th December, 2021 : Vawiin khan Pu Robert Romawia Royte, Minister, Sports & Youth Services, Tourism, Information & Communication Technology Department chuan Sihthiang Old Playground-ah 2nd State Level Hodaigri Festival, 2021- chu Khuallian niin a hmanpui.

Khuallian chuan hmun hrang hrang atanga kalkhawmte kut chibai bukin duhsakna a hlan a, Hodaigri Festival pawimawh tak hmang thei tura Bru Cultural Organisation te hmalakna chu lawmawm a tihthu sawiin Pathianin hnam hrang hrangte min siama, Kristian ram kan nih angin kan hnam nunzia phochhuahna tura hun kan hmante chu Pathian duhzawnga kan hman a pawimawh thu a sawi. Hodaigri Festival chuan Mizoram chhunga hnam
hrang hrangte karah inunauna tha zawk a thlen chu Mizoram Sawrkar pawhin a duhdan a nih thu a sawi bawk.

Minister chuan Hachhek Constituency huamchhung chu ram leilung tha tak, thlai engkim that theihna hmun a ni a, mi taima te'n a rah an seng mek chu lawmawm a tih thusawiin taimak chhuah lehzuala hnathawk turin bial mipuite a sawm a. Mizoram Sawrkar Flagship Programme SEDP hmangin hmalakna nasa taka kalpui a ni tawha, mi harsa zawkte khaichhuahna tur scheme hrang hrang pawh duan chhoh mek zel a nih thu a sawi bawk.

2nd State Level Hodaigri Festival 2021 Sihthiang Old Playground-a neih ah hian thupui "Lost of Culture is Lost of Identity" (Hnam ziarang hloh chu hnam bo a ni) tih chu hman niin he hunah hian Pu Elvis Chorkhy, VCP Sihthiang chuan in lawmna thu a sawi a, Mizoram hmun hrang hrang atanga Bru Cultural Team te'n hnam ziarang lanna lam an entir a. Rengdil Mizo Cultural Dance te'n Cheraw entirin Zaithiam hrang hrangte an zai bawk. He Festival hi Mizoram Bru Cultural Organisation bultuma neih niin Ni 9 atanga neih tan chu vawiin 10 December 2021 zan hian a tiak ang. Hodaigri Festival hi kumtluana Bru (Reang) te an hnathawhna, tluangtaka an thawkzo thei an lawmzia lantir nana hman a ni thin a. Kumin hi a vawi-2 na niin nikum khan a vawi -1 na Damparengpui-ah hman a lo ni tawh bawk a ni.

Sports Minister hian Sihthiang khuaah vek hian Fitness Centre cum Volleyball Court siamna tur Lung a phum nghal bawk.

Pu Zothantluanga, Hon'ble MLA Vice Chairman, Man Power DEV. Board pawhin thusawiin State Level Hodaigri buatsaih a ni chu hnam ziarang chawinun lehnana thil tangkai tak a nih a beisei thu a sawi a. Kan hnam ziarang chawinunga, vawngnung rengchunga in ngeih tlang taka khua leh tui tha ni tura kan khawsak chu thil tul ber a nih thu a sawi. Hodaigri Festival tanpuinan hian Chief Minister aiawhin Rs 1,00,000/-( nuaikhat) a hlan nghal bawk.

Minister hian vawiin vek hian Chuhvel khua leh Saikhawthlir- ah te Fitness Centre cum Volleyball Court siamna tur lung phum nghalin ramri-a Police Duty te a tlawh nghal bawk.

Minister Pu Robert Romawia Royte hi Pu Zothantluanga, MLA Vice Chairman, Man- Power Dev. Board, Pu TC Pachhunga, Ex-MLA & Vice Chairman,Sport, Youth Affairs, Tourism & ICT Board, Pu Rochhunga Ralte, Ex-MLA & Vice Chairman, Land Revenue & Survey Board, Pu V. Lalengmawia, MCS Director, Tourism Department, SP, Mamit bakah Officials dangte'n an tawiawm a ni.