Vawiin khan Sports Minister Pu Robert Romawia Royte chuan a bial Aizawl East-II huam chhunga Veng pathum - Chite Veng, Armed Veng South leh Armed Veng chhunga UD&PA Deptt hnuaia SEDP hmalakna te leh Aizawl Smart City, PWD leh Sport & Youth Services Department hnuaia hmasawnna hnathawh kal mekte a hmunah tlawhin a enfiah.

Smart City hnuaiah cheng nuai 700 senga Chite Football Ground tilian a, phullem phahna tur ruahmanna chu a drawing te nen Power point hmangin Aizawl Smart City hotuten an entir a. Hna bul țan thuai tum a ni a. Fur ruahtui tlak hmaa a structure thawh zawh hman dan tur te sawiho a ni a. Chite Veng thlanmual panna kawng Lei(bridge), ruahin a tihchhiat, MLA Fund atanga emergency-a siamthat hna thawh zawh hlim pawh tlawhin rang taka Chite Local Council ten PWD te design anga an thawk zo chu Minister chuan lawmawm a ti a. SEDP sum cheng nuai 10 hmanga Chite Veng chung lam inkalpawhna siam mek pawh a hmunah tlawhin tualchhunga hnathawktute chu hna tha taka thawk zui turin a chah a ni.

Chite Veng a tlawh zawhin Minister chuan Armed Veng South-a SEDP sum nuai 30  hmanga kawngpui thar siam mek leh MLA Fund hmanga Veng chhung inkal pawhna kawngpui siam thar mekte a tlawh bawk a, hnathawktute chu a veng neitu vek an nih anga thahnemngai taka thawk turin a fuih a ni.

Pu Robert Romawia Royte hian PWD hnuaia kawng siam hnathawh mek leh thawh zui tura rawt pahnih - Armed Veng Service Road leh Armed Veng Lower Road te, SEDP sum hmanga Vengnuam kawng siam hna tan dan tur te, UD & PA hnuaia Armed Veng Community Hall bula tui luankawr chunga *Veng chung leh Veng hnuai inkal pawhna* kawng siam tur pawh a tlawh a, Rs 180 Lakh senna tur kawr chung kawng hi UD & PA department hnuaiah țan thuai tur a ni. Armed Vengah hian 1st M.A.P M.I. hospital building sak mek bakah Mizoram State Sports Council hnuaia 1st MAP Football Ground hnathawh kal mekte a tlawh a, Field sirah a chhawng siam hna tan mek leh phullem phah nana hnathawhte enin chak zawka hna kalpui dan tur department hotute a sawipui a ni.

Pu Robert Romawia chuan vawiin vek hian Commerce & Industry hnuaia Bazar In pui (New Market Building) sak thar Dy. Chief Minister Pu Tawnluia’n a hawnnaah Khual zahawm niin Dy Chief Minister a tawiawm a. Aizawl Veng laili tak, Dawrpui huam chhunga chhungkaw tam tak eizawnna hmun pawimawh leh mipui chhawr tangkai tur Bazar Building thar hawn a ni ta chu lawmawm a tih thu a sawi a, mipuite pawhin vantlang building anga en lova,  neitu rilru pua dimdawi taka enkawl leh vawng fai turin a chah a ni.

Pu Robert Romawia Royte hi  Aizawl Smart City, UD&PA, PWD, Home  leh leh Sport Department hotuten an tawiawm a ni.