Vawiin chhun dar 11:30 hian Industry Minister Pu S.Hiato hovin Industries Department hnuaia NLUP hmalakna thlirhona meeting neih a ni a. He meeting-ah hian Pu Zothangliana Parliamentary Secretary, Pu P.C.Lallawmsanga Principal Secretary, Pu C.Lalbiakthanga Director of Industries, Pu John Saikhuma General Manager, DIC Aizawl, Pu Lalhmunsiama, Nodal Officer (NLUP), Pu G.Malsawmdawngliana Joint Director (H&H)-te bakah Directorate leh District Industries Centre, Aizawl a NLUP buaipuitu Officer-te an tel a ni.

Pu S.Hiato chuan Department Officer-te chu NLUP ti hlawhtling tura nasa taka tan la leh zual turin a fuih bakah NLUP chu sawrkar flagship programe a nih hrerenga thil dang zawng zawng aia ngai pawimawh turin a chah a. Thawktu te ber atanga lian ber thlengin NLUP tihlawhtling turin mawhphurhna an nei a ni tih hrereng tura chahin beneficiary-te an thil hriat duh leh mamawh kawhhmuh kawngah hawihhawm taka lo dawngsawng tur leh theih tawp chhuaha lo tanpui thin turin a chah bawk.

He meeting-ah hian Industry Department hnuaia NLUP hmalakna leh hmachhawp thlir ho a ni a. A tlangpui thuin hmalak tawhna chu lungawi thlak thawkhatah ngaih a ni a. Chutih laiin chhan hrang hrang avanga trade thenkhat kalpui chak theih loh awmte pawh sawi ho a ni. A bik takin Aizawl khawpui chhunga Agarbati Stick Making trade hnuaia beneficiary-te harsatna tawh mek pawh rang taka sut kian pui dan tur sawi ho nghalin a kalpui dan tur pawh duan nghal a ni. Harsatna hrang hrang vanga Department-in sawisel a kainate pawh sawi chhuakin a siam that dan turte sawi ho a ni a. Krismas hma ngei a 1st phase beneficiary-te NLUP hnuaia tanpuina an dawn tur a theih chin chin pe fel thei tura chak leh zuala hma lak ni se, hunpui vuakvet avanga in thlahdah lo tur leh a tul anih chuan sawrkar office chawlh lai pawha thawk turin Minister chuan Department officer-te a chah a ni.