Pu S.Hiato, Minister i/c PHE etc chuan a bial chhung khaw hrang hrang a fang kual mek. A bial chhung khua Niawhtlang, Lungbun leh Chhuarlung khuate a tlawh kual hnuin nizan khan Saiha a thleng leh ta. A bial chhung khuate a tlawhna ah amah thlangtlingtu a bial mipuite leh hna thawk theia siamtu Mizoram Chief Minister Pu Lal Thanhawla hnenah lawmthu a sawi a. Minister chuan mirethei, riangvai leh chanhai pachhiate dawmkan chu kan sawrkar hian a hmalakna hmasa ber tur a ni, a ti a. Kan Chief Minister zahawmtak Pu Lal Thanhawla chuan tunah hian heng mite chhanchhuahna tura hma la in Delhi tlangah a chamchilh mek a. He hna thawk tur hian NLUP Programme chu kan sawrkarin duangchhuakin Chief Minister zahawm tak hian a FUN in a rawn hawn dawn a ni, a ti a. A sawi zelna ah Minister chuan, kan sawrkar chuan hlemhletna umbo hi a tum ber a ni, a ti bawk. A hna chanpual Tourism department a hmalak dan tur sawiin Niawhtlangah Tourist Lodge changtlung taka sak a nih tur thu a sawi a. Amah thlang lotute pawh inthlahrung hauh lova sawrkar tawiawm tlat turin a chah bawk a ni. Minister hi Pu Zothangliana, Parliamentary Secretary, Government of Mizoram leh Saiha leh Lawngtlai District-a department hrang hrang hotu thahnem tak leh party lam hruaitu thahnemtak bakah chanchinbumi engemawzat in an tawiawm a, a kalna khua ah te hian Minister hi khawtlang in ropui taka lo hmuakin ruai an lo siamsak zel a. Minister chuan a kalna khua ah harsatna hrang hrang an thlente chu theih ang anga sutkian sak a tiam thu a sawi bawk a ni.

 

Vawiin chawhma dar 11:00 khan Minister hian Saiha District chhunga Department hrang hrang hotute Deputy Commissioner’s Office ah kawmna neiin he inkawmhona hi Pu Zorammuana, Additional D.C., Saiha chuan a kaihruai a, thu sawiin Minister chuan District Officer te nen inhmelhriat tawnna neih a duh thu leh buaina leh harsatna tel lova inthlanna felfai leh thianghlim tak a awm theih avangin hnathawktute hnenah lawmthu a sawi a, tawngtaina nasa tak hlanin sawrkar tha, retheite huapzo Pathian hnena kan dilna te min chhanna chu tuna kan sawrkar hi a ni, a ti a. Ram hruaitute chu Pathian ruat an ni a, he ram hruaina ah hian kan innghahna leh a kaihruaitu ber chu sawrkar hnathawk te ber atanga lianber thleng hi in ni, a ti bawk. Sawrkar hnathawkte lakah beiseina sang tak an neih thu sawiin thurawn pek an ngaihna apiangah thurawn pe thin turin a ngen bawk. Sawrkar thar hi chuan siam that hna a thawk dawn a ni, tiin a hnathawh leh thiltihte thlawp tlat turin a ngen bawk a ni. Mirethei, Chanhai, In leh lo neilo te leh kuttualleichham te hi kan V.I.P. turte an ni tiin hmangaihna, ngilneihna leh dawhtheihnate nena mipui enkawl turin a chah a ni. Sawrkar hmasa hnathawh a thalai apiangte chu chhunzawm a nih tur thu sawiin rinawm tak leh dik taka hnathawk theuh turin kalkhawmte chu a chah a ni. District hmasawnna tur sawi langin ‘Anchhedawng Tuipui’ Kaladan Tuipui kha hmasawnna tuipui ni turin insumdawn tawnna leh  Electrict Power Megawatt 460 siam chhuak thei tura hmalak mek a nih thu sawi langin mamawh tam tak kan neihte hi tun maiah tihhlawhtlin nghal vek theih ni lo mahse a tahtawl te te a tihpuitlin tum a nih thu a sawi bawk.

He inkawmhona ah hian Pu Zothangliana, Parliamentary Secretary pawhin thu sawiin tun dinhmunah chhim lam pang hi zirna a kan hnufual tak zia sawiin hmasawnna tur kan ngah hle a ni, a ti a, NLUP kalphung thar turah Board fel taka enkawl a nih tur thu a sawi lang bawk. He meeting-ah hian Saiha-a Department hrang hrang hotute an kal tha hle a ni.