Nimin chawhnu dar 1:30 khan Working Committee on Operation of Cancer Hospital, Zemabawk chuan Working Committee Chairman Pu S. Laldingliana, Parliamentary Secretary, Health & Family Welfare Department Office Chamber-ah Meeting an nei.
He meeting-ah hian Zemabawka tuna khum 40 awmna Cancer Hospital kum 100 awm theihna tur atana upgrade dan turte leh Cancer Hospital puitlinga siam a nih theihna tura tul leh mamawh hrang hrangte sawi ho a ni.
He meeting zawh chawhnu dar 2:30 khan Working Committee on Operationalization of Falkawn Referral Hospital chuan Working Committee Chairman Pu S.Laldingliana, Parliamentary Secretary, Health & Family Welfare Department Office Chamber-ah vek Review Meeting an nei bawk.
Tunlai hian Working Committee te hian Falkawn Referral Hospital-a Aizawl Civil Hospital sawn thuai a nih theih nan Working Chairman Pu S.Laldingliana hovin tan an la nasa hle a ni. Falkawn Referral Hospital-ah hian Aizawl Civil Hospital atanga insuan luh thuai a nih theih nana tul leh mamawh, Kawlphetha, tui leh Damlo mutna khum te a rang lama peih fel thuai a nih theih nan tan lak mek a ni a. A hmunhma leh chhehvel tihfai pawh zawh thawkhat a ni tawh bawk. Ruahmanna zawng zawngte hi Nov. ni 16 ah peihfel vek ni se, Nov. ni 20-ah hian Department 5 te chu khum 20 theuh nena suan luh hman tum a ni.
He meeting-ah hian working committee member atangin Pi Esther Lalruatkimi, Secretary H&FW, Dr. Lalrinliana Sailo, Director DHME, Dr. Lalhmangaihi, Jt. Director DHME leh Dr. K.Ropari Jt. Director, DHS bakah PHE leh P&E lam hotute an tel a ni.
