Vawiin chawhma dar 11:00 khan Mizoram Polytechnic Lunglei Fresher Social Programme chu MPL Hall-ah Pu S. Laldingliana, Parliamentary Secretary in a hmanpui. He hunah hian thusawiin Pu Dinga chuan Technical zirlaite chu professional student an nih avangin inthlahdah taka zir theih in ni lo, a ti a. Zirna lamah vai ho hi kan entawn tur a ni a, kan hun zawng zawng nen lehkha kan zir tur a ni, a ti. Mizote hian tlemte zira tha taka pass kan duh a, chutiang nilovin tam tak zira tha taka pass a, zirlai thiam chian kan tum tur a ni, a ti. Eng association ah mah mahni zirlai ti bahlah tur khawpin in hman loh a tha a ti bawk. Tunlai khawvel chu a thiam thiam dinchhhuahna a nih avangin eng hna pawh hmachhawn ngam tur in kan zir tur a ni, a ti a. Zirlaite chuan mahni inthununna tha tak an nei tur a ni a ti bawk. He MPL ah hian kum tin zirlai 110 lak an ni thin a, tunah zirlai 300 vel an awm mek a ni. He programme hi Tv. V.L. Zarzoliana, Vice President, MPSU in a kaihruai a ni.