Pu Satyendra Garg Joint Secretary (North East) Ministry of Home Affairs Chuan Tripura Transit Camp-a Reang (Bru) te dinhmun leh an awmdan hrechiang turin inrinni khan Naisingpara Camp a tlawh a, Mizoram Sorkar atangin Pi Renu Sharma Principal Secretary , Home, Pi Lalbiaksangi DC Mamit, Pu H. Lianzela ,Addl DC Mamit, Pu David H. Lalthangliana OSD, Home bakah Pu Paul Rokima, DIPRO, Mamit te chuan Joint Secrery (North East) MHA tawiawm tur hian zirtawpni khan Naisingpara Camp hi an lo pan tawh a ni.

Joint Secretary (N.E) MHA Pu Satyentra Garg ina Reang (Bru) Relief Camp a tlawhnaah hian Mizoram Bru Displaces People’s Forum (MBDPF) hruaitute bakah Camp a awm mek ten harsatna an tawh te an lo hrilh a, harsatna an thlen zingah hian Reang Mizorama rawn let leh te tan Ram pek an nih loh thu te, Ram (Lo tan) 5 hec tal pek an duh thu te, Buhfai Free Ration kum 2 chhunga pek thin chu kum 4 tala pawh sei te, Mizorama an rawn kirin khaw hran hrana dah lova, a hlawm deuhva (cluster) dah khawm an duh thu te, Pawisa faia tanpuina an dawn hi tun aia tih tam ni se, anmahni harsatna te chingfel a ngaihtuah tur Committee din ni se tih te Joint Secretary (N.E) MHA hnenah hian thlenin, an thil phut te hi ziakin (memorandum) an thehlut nghal a ni.

Reang (Bru) Camp-a awm mek te harsatna thlen hi Joint Secretary (N.E) MHA hian hotu sang zawk hnena thlena, a theih anga hmalak pui a tum thu sawiin, tunah hian Repatriation a Mizorama rawn let tawh Reang(Bru) te dinhmun an awmna a kal chilha zirchiang tura tlawh thuai a tum thu a sawi. Tuna an awm mekna Camp hi hawh lailawk( temporary) a nih avangin hmasawnna ruhrel Sorkar tan engmah kalpui theih a nih loh thu a sawi bawk. Mizorama an let hunah chuan an chanvo pangngai engkim hmu thei dinhmuna an din theih leh dawn thu Reang(Bru) mipui te a hrilh bawk a ni.

Joint Secretary (NE) MHA hian tuna ruahmanna awm mek anga hruaikir hna Repatriation kalpui tur hi central sorkar leh Mizoram sorkar bakah Tripura Sorkar tangrualin tha taka kalpui tum a ni a, tun tuma rawn let lote hi chu engtikah nge hruaikir hna thawh a nih leh ang tih sawi theih a nih loh avangin Mizoram khua leh tui nihna nei te chu kir leh vek turin a chah.

Mizoram Sorkar aiawha kal Pi Renu Sharma, Principal Secretary Home chuan Mizoram Sorkar in Reang (Bru) te chu engtik lai pawhin Mizoramah rawn let se Sorkarin a lo lawm reng dawn a ni tiin, an awmna khua zelah midangte hamthatna hmuh ang an dawn ve vek tur thu a sawi.

Mamit District Bawrhsap Pi Lalbiaksangi, pawhin Reang (Bru) te chu kir leh vek tura sawmin Mizorama rawn kir te chu V.C ram theh(lot) hmanga, an lo atan (jhum land) pek an nih tur thu a sawi bawk.

Tripura a Transit camp a Reang(Bru) hruaikir tur te hi 2014 Electoral Roll anga kalpui tum a ni a, hemi a chuang lo mizoram mi nia inchhal te chu, an thlahtute emaw an awmna khaw hlui mi leh sa atanga endik an ni anga. Hruaikir turte endik hna hi Camp tinah neih phawt a ni ang. Reang (Bru) Repatriation-a Mizoram a rawn let te chu Central sorkar atangin Free Ration nitin 600 gram puitling tan leh 300 gram naupang tan kum hnih chhung pek tur an ni dawn a, heibakah hian Repatriation Grant Rs 41,500/- chhungkaw tin tan ruahman a nih bakah IAY Scheme hnuaia insak tanpuina atan Rs 38,500/- an dawng bawk ang. Mizorama Bru rawn let te hi Free Ration an dawn avang hian Centrally Sponsored Schemes (CSS) hnuaia mi hamthatna engmah a dal dawn lo a ni.

Reang (Bru) Repatriation atan hian Kanhmun-ah Facilitation Centre hawn tum a ni a, hei bakah hian an panna tur District tinah staging centre ( chawlh Lawkna) siam tura ruahmanna kalpui tum a ni.Ruahmanna awmsa angin Reang (Bru) Tripura a awmte hruaikir hna hi November 2016 tinzawn a ni.

Tun thleng hian Reang (Bru) Repatriation chungchangah venhimna kalpuina kawngah harsatna tawh hriat a la nih loh mai bakah ruahmanna kal mek anga Repatriation tih leh turah pawh hian venhimna tha tak nena kalpui tum a ni.

Nimina Tripura Transit Camp-a Reang ( Bru) te Joint Secreatary (NE) MHA leh Mizoram Official ten an tlawhna ah hian Tripura Sorkar atangin North tripura District Magistrate, DIG leh North Tripura SP bakah officials thahnem tak ten an lo tawiawm a ni.