1620/2026-2027

Kolasib, 1st August, 2026: Vawiin khan Pu Sudhir Kumar, IAS, i/c Chief Secretary & Principal Secretary to the Government of Mizoram (GAD/EF&CC) chuan Kolasib a tlawh. A lo zin pual hian DC Conference Hall, Kolasib-ah thutkhawm pawimawh tak neih a ni a, sawrkar mi pawimawh ten an lo dawngsawng a ni.

Pu Sudhir Kumar chuan Kolasib a rawn tlawh chhan sawiin, Kolasib district rawn tlawh theih chu lawmawm a tih thu a sawi a. Forest ram inthuah chungchang a theih ang anga chinfel dan ngaihtuah ho tura lo kal a nih thu a sawi. Hemi hnu hian chawhma dar 10:30 atangin Special Investigation Team (SIT) hmalaknate thlirhona (Review of SIT Works) neih zui nghal a ni a. Thutkhawmah hian line department ten report an pe a, Khaw 22 chu kum 1980 hnu lama din an ni a, khaw 4 chu kum 1980 hma lama din an ni tih tarlan niin, a vaiin khua 26 an ni. Village Council 35 atanga report thehluh a la nih loh thu ngaihthlak a ni bawk.

Heta tang hian ground survey neih dan tur sawiho zui a ni a. District thuneitu lamin surveyor an dil belh mek thu ngaihthlak niin, fur lai a nih avangin harsatna thenkhat a awm theih thu tarlan a ni. Kawngpui kama ram humhalh (road-side reserve forest) huam chin tihchian dan tur pawh sawiho a ni a. MIRSAC leh Revenue pass te pawh department lamin Geo-tagging an tih tawh thu ngaihthlak a ni a, hei hi hmang tangkaiin khaw pali (4) te dinhmun hi chinfel hmasak tura rel a ni. Pu Sudhir Kumar chuan mapping felfai tak siam a, ramri (demarcation) chiang taka kham turin a chah a. Forest Department pawh an reserved forest huam chhungah felfai taka ramri kham a, map uluk taka siam turin a chah nghal bawk a ni.

Chawhnu dar 12:00 atang khan Kolasib District huam chhunga hmasawnna ruhrel hrang hrang (Review of Major District Projects) thawh mekte thlirhona neih chhunzawm a ni a. He hunah hian department hrang hrang hna kalpui mekte leh an hmachhawp report ngaihthlak a ni a. National Highway laihzau leh siamtha meka harsatna awmte leh hmalak chhunzawm zel dan turte sawiho a ni bawk.

Inkawm neih zawh hian Chief Secretary in-charge Pu Sudhir Kumar chuan 4 Lane laih mek endik hna (site inspection) a nei a, District Civil Hospital, Kolasib building thar sak mek chu a hmunah tlawhin a enfiah bawk. Heng bakah hian FCI Godown, Rengtekawn leh Solid Waste Management Centre, Dihmuntlang pawh a tlawh nghal bawk a ni.

Pu Sudhir Kumar hi Pu Vanlalmawia, Secretary, LR&S; Pu Agni Mitra, CF (Planning); Pu H. Dolianbuaia, DC Kolasib; Pi B Malsawmtluangi ,Addl DC leh CALA ni bawk ; Adelbert Susungi, National Highway ED; Binod Kumar Srivastava, GM National Highway leh official dang ten an tawiawm a ni.