3258/2022-2023

Lunglei the 13th January '2023: Lunglei Municipal Council Office Convention Centre Basement-II ami chu vawiin chhun dar 12:00 khan Dy. Chief Minister leh UD & PA Minister nibawk Pu Tawnluia'n a hawng.

LMC Office hawnna inkhawm Convention Centre Lungleia neih hi Pu Lalmalsawma Pachuau Secretary UD & PA Department chuan kaihruaiin khuallian  Dy. Chief Minister Pu Tawnluia chuan thu sawiin, MNF Party in kum 2018 inthlanpui dawna Manifesto kan neih zinga mi thuneihna semzai tihpuitlin nana pakhat LMC hlenchhuah a nita chu lawmawm tih thu sawiin LMC chu thuneihna pawimawh tak tak nei a ni a ti. Khawpui tihhmasawnna tura Sawrkarlaipuia Urban Ministry in ruahmanna a siam leh sum leh pai a pekchhuah ṭhin dawhthleng chu Municipal a ni a, Village Council ringawta kal chuan sum awm mahse a dawhthleng a awm siloh chuan angaihna a awm lo a ti. Tunhmaa awm ngailo Lunglei Municipal Council Office ah Officer leh thawktu ṭhahnem tak an awm thar ringawt pawh Lunglei tan thil hlu tak a ni Pu Tawnluia chuan ti bawkin LMC hian Subject 18 a enkawl dawn a, LMC a taka kalpui a nih hunah chuan In sak chungchangah pawh dan hnuaiah vek thiltih angai tawh ang a ti. Khawpui changkang leh awmze neia hmasawn siam chu LMC hna pawimawh a nih thu leh ṭhangthar lo awm zel turte tan ngaihtuahna sen a ṭul tih a sawi bawk a, khawvel ṭhang zelah faina leh thianghlimna kawng mai bakah retheihna umbo tura kawng hrang hranga LMC kaltlanga hnathawh a ni tur leh NREGS dawng theilo khawpa khawpuia kan awm hi lawmna chang kan hriat a ngai a ni a ti. Dy.Chief Minister chuan LMC chu inthlan phawt tur a nih laiin a hun erawh sawi mai theih a la niloh thu leh Assembly Session neizawh lam March thla chawhnu lam beisei a nih thu sawiin inthlanna neih a nih hma pawhin Subject a neih ang ang te chu theih ang angin tihlawhtling tura thawh nghal a ni ang a ti. Lunglei Municipal Council chu mipuite tan chhenfakawm tak ni tura thawktute leh mipuiten tuaihnuma kan hlut thiam a pawimawh a ni tiin retheihna leh phurrit a ngailo a, retheihna umbo na tur leh khawpui hmasawnna phuisui zawk a ni tih i hria ang u a ti.

 Sorkar hmalakna thenkhat sawiin Jal Jeevan Mission hnuaia Lunglei District  thingtlang khua a chhungkua 17466 te hnenah  tui connection kum 2023 hma ngeia pek zawh tum thu a sawi a. SBM (Rural) hnuaia khaw 38 ah ekin 138 siam anih tur thu a sawi bawk. Lunglei Greater Water Supply Scheme tih changtlun nan cheng vaibelchhia 10 hmangin hnathawh mek a ni a ti. Lunglei khawpui faina leh thianghlimna ah pawh hmalak mek a ni a ti bawk.

 He hunah hian Pu H.Lianzela UD & PA Department Director chuan report pein LMC chuan Lunglei khawpui chhung V.C 24 a huam tur thu leh Ward 11 ah ṭhen a nih thu leh Voters Singli zanga sawmli pakhat (40541) an awm thu tarlangin tuna V.C nilai mekte chu Local Council a thlak turin Mizoram Sawrkar chuan nikum August thla khan a lo remtih tawh thu a tarlang a, LMC atan hian Sawrkar kum kallai  ah cheng Nuai 80 dah niin kum 2022- 2023 atan pawh Cheng Nuai 80 bawk dah leh a nih thu sawiin LMC Office hi nikum November ni 9 aṭang khan Chief Executive Officer hovin thawktuten an luahlut tawh tih a tarlang bawk. Vawiina Lunglei Municipal Council Office hawnna inkhawmah hian Agriculture Minister Pu C.Lalrinsanga, Lunglei HPC Vice Chairman Pu Lawmawma Tochhawng, Lunglei D.C Pu Kulothungan A leh Lunglei District V.C Association President Pu H.Lalremruata te pawhin thusawina hun hmang in, Dr. K.Pachhunga MLA leh Dr.Vanlaltanpuia MLA te leh Sawrkar Official, Political Party hrang hrang aiawh te bakah, Media mite leh sawmbik mi ṭhahnem tak an tel a ni.

Pu H.Lalhmingthanga, Chief Executive Officer Lunglei Municipal Council chuan lawmthusawina nei.