No.3640/2021-2022
Aizawl, 12th January, 2021 : January ni 12 chawhma khan Environment, Forest & Climate Change Department-a thawktute chuan kum thar 2022 atan inhlan tharna hun PCCF Conference Hall, Tuikhuahtlangah EF&CC Minister, Pu T J Lalnuntluanga hovin hman a ni.
Pu Jitendra Kumar, PCCF & Principal Secretary chuan thuhma sawiin kum tharah rilru thar nen theih tawp chhuah turin Department-a thawktute a ngen a. Hunserh hmangtu Pu Loncy Chhakchhuak chuan EF&CC Department a thawktute hotu hmasa ber chu Adama a nih thu sawiin, EF&CC Department-a thawktute chuan mawhphurhna ropui tak an nei a ni a ti.
Pu T J Lalnuntluangan, Minister chuan thahnemngai tak leh taima taka mahni hna theuh thawk turin Officer te a chah a. EF&CC Department-a thawktute chu Mizoram chauh ni lo, khawvel pum nghawng Pathian kutchhuak, ramngaw humhalhtu leh siam thatu dinhmunah an ding a ni tiin, kan tan, kan fate leh kan tuchhuan lo la awm turte tan hna an thawk a ni tih hre turin a chah a ni. Thawktute leh mipui leh NGO-te hmalakna avangin thing leh mau, nungchate humhalh duhna nasa taka lo pung ve zel chu a lawmawm hle a ni a ti.
He hunah hian Minister chuan EF&CC Department buatsaih, Mizoram chhunga phengphehlep chi hrang hrang 153 chanchin kimchang tarlanna android mobile application, Butterflies of Mizoram chu mipui hman theih turin a tlangzarh a. He android application hi playstore-ah a duh apiang hman theiha dah a ni. Awareness campaign atana hmanraw pawimawh tak Slogan Poster Calendar-2022 pawh a tlangzarh nghal bawk.
He hun hi hripui leng avangin kum dang anga hmang lovin sorkarin SOP a zawmin Group A officer chin chauh an tel a ni.
Attachment
- Loading attachment...
