1625/2023-2024

23.08.2023: Pu TJ Lalnuntluanga, Transport Minister chuan vawiin chawhma dar 10 vela Khamrang leh Sihhmui inkara Rel kawng tur atana Lei dawh lai mek chim chu a hmun ah a tlawh a.

Minister in chhiat tawhna hmun a tlawh lai hian Lei dawhtu Railway company hotute sawi danin he vanduaina a thi te hi an vaiin West Bengal lam mi vek a ni a. Ruang te hi Sairang Dinthar YMA Hall ah lak niin, hetah hian Post Mortem tih nghal tur a ni. Post Mortem leh thil tul dang tih zawh an nih hnu a, Ruang hi Railway lam hotuten a tul angin an buaipui zui dawn a ni.

Minister chuan he chhiat tawhna thleng hi pawi a tih thu sawiin, state sawrkar in tih tur tul te a tih nghal thu leh a tul angin Central lam hotute pawh an biak rawn nghal thu a sawi, he chhiat tawhna chungchang ah rang taka hmala tu Police, NDRF, Quick Response Team, Sairang khawtlang te chungah lawmthu a sawi a ni.

Minister bakah hian Pu C. Lalrosanga, MP (Lok Sabha), Pu K. Laldawngliana, MLA; Pu Zothantluanga, MLA, Chief Secretary, DGP bakah sawrkar officials engmaw zatin a hmun hi an thleng thla nghal a ni.

Bairabi leh Sairang inkara Rel kawng siam hna hi Northeast Frontier Railways (NFR) te thawh a ni a, Rel kawng thui zawng hi 51.35 Km a thui niin, kumin 2023 December thla hian zawh fel hman tura tih a ni.