125/2022-2023
Champhai, the 11th April, 2022: Law & Judicial Minister Pu T.J. Lalnuntluanga, Champhai South bialtu MLA chuan vawiin khan a bial chhunga zirna in bakah, Melbuk leh Zokhawthar khuate a tlawh. Melbuk to Zokhawthar kawng siam mek leh Zokhawthar khuaa sumdawnna hmunhma bakah raltlan awmna leh Melbuk Ui lui Tiau kama raltlan awmnate a tlawh a ni.

A bial chhunga zirna in Champhai South Higher Secondary School, Electric Veng leh Govt. Ruantlang High School-te a tlawhnaah thusawiin, Minister chuan mitin banphak zirna tha chhawpchhuah tuma hmalak a nih thu sawiin, Zirlaite chu ram leh hnam hmangaihna tak tak nena lehkha zira an thiamnate chhawr tangkai turin a fuih a. Dikna, rinawmna leh taimakna nunpui tlat tur leh, rilru hrisel midangte nena hmasawntlanna ngaihtuah tel thin turin a chah bawk. 

Ram leh hnam hmelma, hmasawnna tithuanawptu ruihhlo laka fihlim tura chahin, zuk leh hmuam laka inthiar fihlim hram hram turin a fuih a. Sik leh sa inthlak danglam chak lutuk ven leh, ramngaw leh nungcha humhalh kawnga theihtawp chhuahpuiah a sawm bawk a. Tum bik neia lehkha zir tur leh, hlawhtlinna nei ngei thei tura taimakna, tumruhna nei a, inngaihniam bik mai lova chungnunna thinlung pu chung leh kan hnam hian kan tithei ve tho a ni tih nunpui tur te, ram leh hnam dahsang tur leh chawikan kawnga theihtawp chhuah theuh turin a sawm bawk a ni.

Law & Judicial Minister hian vawiin chawhma  vek khan Juvenile Justice Act tlawhchhana din kum tlinglo dan bawhchhiate enkawlna hmun Observation Home, Champhai Zotlang a tlawh bawk a, thawktute leh enkawlte kawmna hun  hmangin infiamna bungruate a hlan a ni.

Pu T.J. Lalnuntluang hian chawhnu lamah Zokhawthar khua a tlawh a. Ramri depa awm khaw pawimawh tak Zokhawthar panna kawng awm hmasa chhe tawh tak siam tha thuai tura  hnathawh mek zel a nih thu leh World Bank Road siam leh hemi avanga harsatna awmte pawh a tul anga buaipui zel tum a nih thu a sawi a. Thenawm ram buai avanga harsatna awmte a ziaawm huna insumdawntawnna dan pangngai anga mumal taka kalpui a nih theih nan ngaihtuahna sen mek zel a ni, a ti bawk a. Zokhawtharah Taxi leh Auto Rickshaw service a nih theih nan hmalak a nih thu a sawi bawk a. A bial mipui, NGO, Kohhran leh mi inphal tak tak ten thenawm ram buai avanga that an chhuahna avangin lawmthu a sawi bawk.

Official leh khawtlang hruaitute nen World Bank Road kawng laih hmun hrang hranga leimin leh leidawh chimte an tlawh a. Melbuk atanga Zokhawthar panna kawng siamthat mek SLT Infracon Private Ltd. te hnathawh pawh a hmunah kalin a enfiah a. Hnathawktu Company leh PIU te chu fur ruahtui tlak hma ngeia kawng siam zo hman turin a hrilh a. He kawng kilometre 6 a thui hi km 4 vel dawn chu lung phah zawh tawh niin, hemi hnu hian alkatra hmanga luan hna thawh leh nghal tum a ni.

Minister hian Zokhawthar Land Custom Station thuamthat nan leh nakin lawkah Integrated Check Post a hlankai nana hmalak tulte Official leh khawtlang hotute nen an enfiah bakah, Myanmar ram buai avanga Zokhawthara raltlan awmna hmunte leh Melbuk Ui lui Tiau kama raltlan awmna a tlawh bawk a. Khawtlang mamawh thlente leh raltlan mamawh angte  a tul ang zela buaipui tum a nih thu a sawi a ni. 

Minister tawiawmtu Bawrhsap Pu James Lalrinchhana chuan ramri depa awmte chu chhel tur leh rilru fim tak pu tura chahin, raltlan dawnsawn leh enkawl kawnga an hmalakna fakawm a tih thu a sawi a. Sawrkar hmalakna tawiawm zel tur leh ram venhim kawngah sawrkar kutke an nih anga finchhuaha theihtawp chhuahpui thin turin a chah a ni.

Law & Judicial Minister hi Pu Lalrinpuia Varte, SP; Pu Lalduhthlana DFO leh Dr. Lallawmkima DIPRO ten an tawiawm a ni.