No.709/2020-2021

Law Minister, Champhai South bialtu MLA nibawk Pu TJ Lalnuntluanga chuan vawiin lam khan Indo-Myanmar ramri khua a VLTF te leh Tiau kama duty post te a hmunah kalchilhin a tlawhkual a, an hmalakna te enfiahin hmalak zel dan turte a sawipui a ni.

Law Minister Pu TJ Lalnuntluanga chuan ramri depa hmalaknate a hmuna enfiaha lawmthu sawi tur leh mamawh angte enfiah tura tlawh anih thu a sawi a. Ram ropui leh thil ti thei zawkte pawh an buai em em a, keini chenin he hripui hian min tibuai a ni, a ti a. Hripui laka invenhim kawngah  Mizoram Sawrkar chu nasa takin a lo inhmakhua lawk a, hmun dang aia hmain lockdown kan puang a, Airport leh ramri Luhka hrang hrangte pawh khar hmasa ber pawl niin, hmun dangte awh em em Local/ Village Level Task force din vat niin, an hmalakna hnuaiah kan la him zel a ni, a ti a. Hripui in reh hun a la neih ngei a beisei thu leh a hnu leh lama khawsak zel dan tur ngaihtuah tel a tul zia tarlangin, nakin lawka ram sum leh pai dinhmun tlachhe lo leh ei leh bar tlachham lo turin a theih ang anga hnathawh kan tum tur a ni a, intodelh hram hram kan tum tur a ni, a ti bawk. 

Kohhranin ram mipuite himna atan Biakin kharin tawngtai lamah theihtawp an chhuaha, mipui te’n  thuawih taka dan kan zawm avanga himna chu chhuanawm tiin, hei hian  thawhhkona tha tak a entir a, kan inlungrualna leh thuawihna hi kan himna kawnga pawimawh ber ani, a ti a. Daido a awm kan nih hrerengin, duty te kan taimak a, sawkarin kan tana tha tur dan a siamte zawma fimkhur taka lo invenlawk hi kan damna tur  damdawi lian ber anih thu a sawi a. Mipuite chu  tu dang tan maha thawk kan ni lova, mahni, chhungkua, ram leh khawvel tana inpe a thawk kan ni tih inhrethar leh turin a ngen bawk.

Pu TJ Lalnuntluanga chuan tha thlah lova duty thin thawktu zawng zawngte fakawm tiin, harsatna awm palh thulh pawha rilru zau tak pu chunga ram leh hnam damna ngaihtuah chung renga rinawm leh taima taka tang mar pat turin a chah a. Hripui len hnulamah  ei leh bar tharchhuah kawnga  intodelh tum a pawimawh thu sawiin, inventhat chuan hripuiin min kiansan hun a la awm ang, chumi hnulama kan kalzel dan tur leh harsatan pumpelh dan turte pawh kan ngaihtuah tel a ngai a ni, a ti a. India ramah hrikai an pun zel rih avangin lockdown hun chhung chu tun dinhmun thlirin kalpui chhunzawm anih a rinawm hle a, ramri leh Inter district boundary te ven uluk zual angaih  dawn thu a sawi a. Kumin chhung kan fimkhurna  hian Zofate kan himna leh damkhawchhuahna chenin thui takin a hril thei dawn a ni, a ti bawk.

Pu Lalnunfela Chawngthu, SDO Sadar Champhai chuan March ni 23, 2020 atanga inkharkhip dan kalpui tan niin thla khat chuang kalpui anih tawh thu a sawi a. India ramah Covid-19 hripui chuan hniam lam aiin zual lam a pan rih zel avangin fimkhur zual a ngai a, abikin Champhai District chu ramri depa awm anih avangin hmun dang aia fimkhur lehzual angai a ni, a ti a. Village Level Task Force-te hmalakna chu fakawm tiin, kan thil do mek chu ang khat vek anih avangin lungrual taka thawhho zel angai a, sawrkarin inkaihhruaina dan a zamte ngun taka zirchianga, chumi zulzuia inkharkhipna kalpui thiam a tul hle ani, a ti a. Thla khat chuang inkharkhipna  kalpui anih hnuah a kalphung kan hrechiang thaw khat viau tawh a, ei leh bara intodelh anih theihna turin mipuite eizawnnate hrek bet lutuk lovin sawrkarin himna tur a duan te zawm chung zela  inthlah zalen thiam angai tih sawiin, VLTF leh duty te chu harsatna awm hunah pawh hotute hnena thlen vat thin turin a chah a ni.

Ramri dep khuaa khawtlang hruaitute chuan  ramria ralven bukte a hmun ngeiah Minister-in  a tlawh chu lawmawm an  tih thusawiin, ramrite uluk taka ven a nih thu an sawi a. Myanmar lam atanga hripui a lo luh lohna turin ramri vengin mi tlawmngaite an rammu mek a, he hripui a lo luh lohna tura thawhhona chuan rah tha tak a chhuah ngei an beisei thu an sawi a. Ram leh hnam tan theihtawp an chhuah chhunzawm zel dawn thu pawh sawiin, Mizoram mipuite thlamuang taka awm turin an chah a ni.

Law Minister leh amah tawiawmtute hian  tukin atang khan ramri dep khua VLTF te, khawpui chhung VLTF tlawh hmabakte leh ramria rammu mekte an  tlawh kual tan a. Dilkawn VLTF leh  Kelkang VLTF te tlawhin Kelkang Bethel tlang ‘Hmun Thianghlimah’  hripui laka him theihna tura tawngtaina hun an hman zawhah Mualkawi VLTF leh New Champhai VLTF te  an  tlawh leh a. Tlangsamah tukthuan eiin, VLTF te an  kawm a. Tlangsam leh Myanmar ramri  Zimpui kai Tiau lui kam duty post pahnih, Tlangsam VLTF leh Sub Hqtrs YMA Anti Covid-19 Squad kaltlanga Champhai Venglai Branch YMA duty te awmna Tiau kam tlawhkualin an enfiah bawk. Chawhnu lamah Tlangsam chhuahsanin, Champhai Zote VLTF  leh Zote ramri Tiau kam Fartlangkai duty post-a  rammu  mek Police, Chhungte Branch YMA leh Zote Branch YMA te an tlawh bakah a chhak maia duty Electric Veng Branch YMA leh Ngur Branch YMA te duty post an tlawh leh a. Tlai lamah Ngur VLTF an tlawh bawk a ni.

Pu TJ Lalnuntluanga hi Pu Lalnunfela Chawngthu, SDO Sadar; Pu C.Lalengliana, Addl SP; Pi R.Lalnunkimi, BDO; Dr. Lallawmkima DIPRO leh Pu Thanliana  Hauhnar, ACF te bakah khawtlang hruaitute leh Chanchinbumite’n an tawiawm a ni. Ruahman dan chuan naktuk lam hian ramri dep khua New Hruaikawn VLTF, Hruaikawn VLTF, Bulfekzawl VLTF, Zokhawthar VLTF, Melbuk VLTF, leh Tiau kama duty post hrang hrang Official-te nen an tlawh chhunzawm leh dawn a ni.

Champhai District Myanmar ramri depah hian Police duty post 31 ah Police 90 leh YMA Duty post 77 vel a awm meka, mamawh leh tul anga tihdanglam thin a ni.  Hmun thenkhatah Police leh YMA an  duty tlang bawk. April Ni 27, 2020 (Thawhtanni) atang khan Sub-Hqtrs YMA Champhai hmalaknain SYMA Anti Covid-19 Squad, member 196 awmna Champhai khawpui chhung YMA Branch hrang hrang atanga member tlawmngai penchhuakte  chu ruahmanna felfai tak hnuaiah ramri dep khua te puiin an rammu tan a.  Hmunhmeltha  Branch YMA Squad 2 te Ruantlang ramah an rammu a, Champhai Venglai Branch YMA Squad 2-te Tlangsam ramah , Electric Veng  Branch YMA Squad 2-te Ngur ramah an rammu a, Chhungte Branch YMA Squad 2-te Zote ramah an rammu  a, New Champhai Branch YMA Squad 2-te Sesih ramah an rammu  a, Kahrawt Branch YMA Squad 2-te Ruantlang ramah an rammu bawk. Vengsang Branch YMA Squad 2-te Melbukah an rammu a, Bethel Branch YMA Squad 2-te Bulfekzawl ramah an rammu a. Hmunhmeltha, North Khawbung, Mualveng, Zion Veng leh Zotlang Branch YMA Squad 2 theuh avaiin squad 8,  Zokhawthar ramah an rammu a. Diltlangah Vengthlang North Branch YMA Squad 2 leh Vengthlang Branch YMA Squad 2-te an rammu mek bawk a ni.