Vawiin chawhnu khan Law Minister Pu TJ Lalnuntluanga chuan India leh Myanmar inkalpawha insumdawnna hmun pawimawh tak Zokhawthar chu tlawhin, Sawrkar official pawimawh tak takte nen Immigration Check Post buatsaih leh Integrated check post siam tura pawimawh te tlawhin an enfiah a. Land Custom Station ah khawtlang hruaitute nen inkawmhona hun an nei a ni.

Law Minister chuan ramri kaltlanga insumdawntawnna chungchanga harsatna awm thinte sawrkarin a hrerenga, sutkian aniha dan ang taka kalpui anih theihna turin a bawhzui zel a ni, a ti a. Dan ang taka ramri kaltlanga inkalpawhna mumal tak siam anih theihna turin Immigration Check Post reiloteah kalpui tan tum anih thu a sawi a. Zokhawthar tlawha a hmun ngeia enfiah ani chuan hmalak zelna turah awlsamna a siam ngei a beisei thu sawiin, State Sawrkarin nikum February thla atangin Sawrkar laipui a dawr a, nikum lamah district thuneitute nen Myanmar lama Immigration Check Post te chipchiar taka tlawha zirchian anih tawh thu a sawi a. Sawrkar aiawh ten Moreh, Manipur hmun tlawha lntegrated check post te an zirchianga, dan anga sumdawnna kalpuia zalen taka insumdawntawnna kalpui chu sawrkar duh dan ani, a ti a. Zokhawthar Police Outpost ni thin tunhnaia Police Station puitlinga hlankai ani chuan venhim hna kalpui kawngah awmzia thui tak a neih a beisei thu a sawi bawk.

Champhai Bawrhsap Pu SL Naveen pawhin thusawiin, Zokhawthara ramri kaltlanga inkalpawhna leh insumdawntawnna mumal zawk siam anih theihna tur kawngah district administration in a tih ve theih angah te tha thawha tawiawm a inhuam reng thu a sawi a. He hun ngaipawimawha lokal zawng zawngte chungah lawmthu a sawi a ni.

Pu HD Rintluanga, Joint Director, Commerce and Industries pawhin thusawiin, Immigration check post bunfel chu thil pawimawh tak ani tiin, Land Custom Station tihchangtlunga Integrated check post a hlangkai chu sawrkar ngaipawimawh ani, a ti a. Integrated Check Post ah chuan Food Testing Lab, Plant Quarantine, Animal quarantine or check post, weight bridge leh hmanraw dang dangte dah tur ani, a ti a. Cheng vaibelchhe 14.35 senga Zokhawthar-Khawmawi Lei siam tuma DPR thehluh anih tawh thu pawh tarlangin, Indo Myanmar insumdawntawnna mumal leh felfai tak nei tur chuan ram pahnih thuneitute a khat tawka inbiak leh rel fel ngaite sawiho thin a ngaih thu a sawi bawk.

Thusawitu dang Pu David H.Lalthangliana, OSD to Home Department chuan Immigration check post awmzia leh pawimawhnate a sawifiah a. Free Movement Regime chhunga inkalpawhna tur atana pawimawh tak Border Pass pawh tun atanga hun reiloteah pekchhuah theih tura ruahman ani tiin, Border pass te hi district SP atangin lakchhuah theih tur niin ramri atanga kilometre 16 thlenga inkalpawhna tur a ni a, chumi endikna tur chuan immigration check post hi bun ani, a ti a. Ramri kaltlanga anihna tur ang taka sumdawnna kalpui anih theihna turin Sawrkarin chak taka hma a lak reng thu sawiin, Myanmar nen pawha inbiakna neih tawn zel a pawimawh thu a sawi bawk.

Law Minister hi Pu SL Naveen, DC Champhai; Pu Rex Zarzoliana, SP Champhai; Pu Alexander V.Chongthu, Joint Secretary, Commerce and Industries; Pu David H.Lalthangliana, OSD to Home department; Pu ZD Rintluanga, Joint Director, Commerce and Industries; Pu Lalduhthlana, DFO Champhai; Pu Lalnunfela Chawngthu, Settlement Officer Champhai; Dr Lallawmkima, DIPRO Champhai leh Official dang ten an tawiawm a ni.

Pu TJ Lalnuntluanga hian vawiin vek khan Zokhawthar Playground laih mek a hmunah kalin a enfiah bakah Zokhawthar Middle School, lei che avanga harsatna tawkte khawtlang hruaitute nen enhoin hmalak dan turte an sawiho bawk a ni.