Border Area Development Programme (BADP) sum cheng nuai 20 senga sak Ngur Vengsang Community Hall thar chu vawiin khan Champhai North bialtu MLA Pu TT Zothansanga’n a hawng.

Hawnna inkhawmah thusawiin Pu TT Zothansanga chuan  ramri hrul kilometer 10 huamchhunga chengte tana hamthatna BADP kaltlanga awmte tangkai leh zuala  hman anih theih nan khawtlang tanrual angai a, sawrkar lam nena intawiawm tawn zel angai a ni, a ti a. Sawrkar hmalakna BADP kaltlanga Ngur Vengsangin Community Hall tha tak anei thei chu lawmawm a tih thu leh a puitlin theihna tura sawrkar leh BDO hmalakna  chu fakawm a ti a. Hall-a thuamthat ngai la awmte pawh lo enzuia puia, tanpui a inhuam reng thu a sawi a. Sawrkar flagship programme NLUP hmangin mirethei leh chhumchhiate leirem rahna tura puih an ni, a ti a. NLUP dawng tur a bial chhungah In 800 dawn lai pek mai theiha thlan fel anih thu leh remchan lohna awm avang chauha pek chhuah rih loh anih thu a sawi a. Central sawrkar-in Food Security Act a hman hnuah State mipuiten harsatna an tawk thei dawna a lan avangin Mizoram sawrkarin theihtawp a chhuah a, ration card hmanga buhfai lak chhunzawm anih theihna turin tan a la a, a hlawhtlinna duhawm tak zarah mipuiten buaina an tawk ta lo a ni, a ti a. Ngur khaw mipuite chu Community Hall thar neih chu duhtawk mai lova a enkawl thianghlim leh venhim kawngah neitu thinlung pu chunga uluk taka vil chhunzawm thin turin a fuih nghal a ni.

Community Hall thar hawnna hun hi Pu Sawngpauva, VCP Ngur chuan a kaihruai a. Pi Rebecca Laldinmawii Hrahsel, BDO Champhai-in report a pe a. Ngur khawtlangin bialtu MLA thahnemngaihna leh sawrkar hotute hmalakna chhawra Community Hall pahnih an nei thei chu vannei a tih thu a sawi a. Pu L.Khenpauva, Ex-YMA President, Ngur-in lawmthu sawina neiin hun a khar a ni.

Ngur Community Hall hi kum 2013 atang khan sak tan a ni a, A zau zawng hi a dung feet 72 leh avang feet 36 a ni.