3819/2023-2024

Aizawl 14th February, 2024 : Pu Vanlalhlana, PWD Minister chuan vawiin khan Govt. J. Thankima College te'n Cultural Day Cum GJTC Fest an hman chu khuallian niin a hmanpui.

Minister chuan Govt. J. Thankima College-in kan hnam ziarang phochhuahna hun tha tak mai an buatsaih chu a lawmawm hle a ni tiin aia upa zah, thian chhan thih ngam leh tlawmngaihna te chu kan chhawmnun a, kan chawisan a pawimawh a ti. Zirlaite chu lehkhabu atang chauha thiamna nei lova, khawvel danglam ang zela thiamna tha zawk zawng thin turin leh mi tumruh, taima, tuarchhel leh teirei peih mi ni turin a chah a. Kan eizawnna te chu Mizoram chhungah chauh duhtawk lova ram pawn lama inzarpharh tur leh dikna leh rinawmna ngaipawimawh a, MPSC, UPSC bakah SSC Exam uar tur leh zir sang ni ringawt lova mi thiam, rawntlak leh hnathawk thei nih tum turin a chah a ni.

Minister hian College tihhmasawnna atan a Fund atangin cheng Nuai 5 a pe a. Cultural Item-a inelna an buatsaih lawmman a sem nghal bawk a ni.

Prof. JV Nunchunga, Principal leh Alumni Association atangin Pu Paul Rokima leh Pu Emanuel Lalhmangaihsanga te hnen atangin zirlaite fuihna thusawi ngaihthlak a ni bawk.

Govt. J. Thankima College hi a tirah Bawngkawn leh Durtlang khawtlang mipuite din niin College pahnih J. Thankima College 1993 leh Lalhmingthanga College 1992 te din a ni a. A hnu Kum 2002-ah heng College pahnih te hi College pakhatah chhungfinin a hmingah L&J College tih a ni a. Kum 2007-ah J. Thankima College tih niin NAAC tehna hmasa berah C++ a ni a. Tuna tehna thar ber December 2022-ah khan A+ hmuin Mizoram Sorkar College-ah A+ hmu thei awmchhun an ni. Kum 2007 atang khan MZU zawm nghetin UGC hnuaia Scheme hrang hrangte an dawng chho tan a. RUSA 2.0 Scheme hnuaiah Model Degree College atana thlan a ni bawk a ni. Tunah hian zirlai 1090 awm mekin thawktu Teaching Staff 41 leh Administrative Staff 12 an awm mek a ni.

Vawiin hun hi chawhma lam Cultural Programme atana hman niin chawhnu lamah GJTC Fest neih a ni a. Special items hrang hrang House Band, Duet bakah Guest Artist hoin hun hlimawm tak hmanho a ni.