3889/2023-2024

Aizawl 20th February, 2024 : Pu Vanlalhlana, PWD Minister chuan Indira Gandhi National Open University (IGNOU) Convocation Vawi 37-na IGNOU Regional Centre, Selesih, Aizawl-a neih chu a hmanpui.

Pu Vanlalhlana chuan thawhrimna leh taimakna rahchhuah Degree, Diploma leh Certificate zirlaite'n an dawng tur chu a lawmpui thu sawiin damchhunga inzir reng tur kan nih avangin zirna chu duhtawksan mai lova inzir reng turin a chah. Dinhmun harsatna avanga zirna sang zawk zir chhunzawm thei lo tur tam tak IGNOU zara inzirchhuak an awm thin leh Course hrang hrang zir tur a awm chu thil lawmawm tak a ni tiin Degree, Diploma leh Certificate an dawn chu khawtlang tana hmang a, a tha zawnga danglamna thlentu ni ngei se a duh thu a sawi bawk.

Minister hian zirlai hlawhtlinna changte Master Degree 580, Bachelor Degree 561, PG Diploma 46, PG Certificate 5, Diploma 4 leh Certificate zirlai 47, an vaiin mi 1243 te hnenah Degree, Diploma leh Certificate hi a hlan a ni.

IGNOU Regional Centre, Aizawl hi Kum 2000 a din tan niin tunah hian an hmunpui Selesih, Aizawl-ah hian thawktu mi 8 an awm mek a. Mizoram District 10-ah te inzarphahin Learner Support Centre 24 leh Academic Counsellors 201 an awm mek a. Kumtin zirlai thahnem tak an nei thin a ni. CCH Programme hnuaiah zirlai 324 awmin 100% zirlai admit an ni a. An vai hian Community Health Officer a chhawr vek niin hei vang hian Department of ICT, Govt. of Mizoram chuan 12th May, 2023 khan Government Online Excellence Award a lo hlan tawh bawk a ni.

Vawiin vek hian IGNOU Convocation Vawi 37-na hi Shri. Jagdeep Dhankar, Vice President of India hovin New Delhi-ah hman a ni a. An hun hmanlai hi biakhmuhtheihna hmanga thlirho a ni bawk.

Convocation Aizawl-a hmanna hunah Dr. S.R. Zonunthara, Sr. Regional Director, IGNOU RC Aizawl chuan kalkhawmte lawmna thu sawiin report a pe a. Dr. V.T. Jalajakumari, Regional Director, RC Aizawl chuan lawmthu a sawi bawk a ni.