No.4018/2021-2022

Aizawl, 17th February, 2022 : Nimin, February 16 khan Mizoram Rajya Sabha MP Pu K.Vanlalvena chuan Mamit District Chuhvel khaw daia Assam ramri bul hnaiha Mizoram Police Duty Post te a tlawh a. Nikum lama Assam police ten Mizoram chhunga Pu Hallidaya huana hnathawktute an rawn tihbuai avanga Mizoram sawrkarin Mizoram Police Duty Post a siam thar te hi a hmunah kal chilhin an dinhmun te a en a ni.

Pu Vena chuan Google Map imaginary boundary line tih chhuanlama hmanga Assam ho ten an ram nia an chhal thui tak awpa Mizoram sawrkarin Police te duty post a siam thar chu thil chhinchhiah tlak tak a ni, a ti a. Helai hmuna Police Duty post tur building panga(5) sak thar tura Mizoram sawrkarin tender a chhuah mek te, a panna kawng tha zawk siam tura sawrkar inbuatsaihna te, Police duty post a solar light sawrkarin a lo dahte chu lawmawm a tiin  thlamuan thlak a tih thute a sawi a. Mizoram Police duty post panna kawnga luite pahnih chunga motor lei dawh thatna tur pawh MP LAD Fund neih hunah pek ngei a tum thu a sawi bawk a ni.

MP Pu Vena hi Chuhvel VCP leh khawtlang hruaitute bakah MNF party unit hruaitu te leh Police Post Commander Inspector B.Lalnunsanga ten an lo dawngsawng a ni. Helai hmuna Police Duty post pahnih ah te hian ramri vengtu police 37 rual an duty mek a ni.