1100/2024-2025

LUNGLEI; the 8th July, 2024: Vawiin khan  Hausiampa Hall, Haulawngah MHIP Haulawng Branch kum 50-na (Golden jubilee) lawm niin; Pu V. Malsawmtluanga (MSTA), Lunglei North bialtu MLA leh Vice Chairman, High Powered Committee Lunglei  ni bawk chuan khuallian niin hun a hmanpui a. Pi R. Lalbiakṭhuami, President MHIP Haulawng branch  chuan  Golden jubilee lawmna programme hi a kaihruai a ni.

Vawiin Jubilee lawman programme-ah hian thu sawiin, Pu MSTA chuan  MHIP ten amah hria a,  thilpek hlu tak an pek avangin lawmthu a sawi a, Mizoran Sorkar chuan Hmeichhia te a ngai pawimawh a  anmahni pualin budget a dah hial a ni tiin, Hmeichhe Cabinet Minister hmasa ber ni turin Pi Lalrinpuii a ruat a ni bawk a ni, a ti. Pu MSTA  chuan nih tum  hrang hrang a lo neih tawhte a hmachhawnah hlawhchham ṭhin mahse, a nu in a ram leh a felna zawnpui hmasa tlat chunga a enkawlna chuan rah ṭha a chhuah tih  sawiin fate nun kaihruai a, khawtlang hmasawnna turin NU te chu dinhmun pawimawh tak chelhtu in ni, a tih bakah  MHIP Haulawng branch te chu an RUN sak zauh nan a fund a pek ngei tur thu a sawi bawk.

MHIP Haulawng Branch hi  Khuangchawi thla ni 3, kum 1972  zanah khan HMEICHHE  NUNTHAR  PAWL tiin din a ni a, Mizoramah MHIP a lo din takah chuan Hmeichhe Nunthar pawl Haulawng chu MHIP-ah a inchhunglut ta a ni. Tun dinhmunah MHIP Haulawng branch-ah hian member 530 an awm mek a ni.

MHIP Haulawng branch Golden jubilee lawmnaah hian  Zaithiam lar R. Lalhmingmawia (Mapuia) chuan zaiin mipuite a awi reng a.  Haulawng  V/C, YMA leh MUP te chuan MHIP te hnenah hian Golden jubilee lawmpuina thilpek an pe ṭheuh a. MHIP Haulawng branch chuan hruaitu lo ni tawhte hnenah memento an hlan ṭheuh bawk.

Pu MSTA hian Haulawng V/C House-ah Public Interview a nei nghal bawk.